退休賓架Ｂ講起一啲銀行識得一早就追數，醒目過人，其中有乜原因呢？賓架Ｂ話好靠有經驗嘅老鬼（起碼有二三十年嘅前線貸款及信貸風險管制經驗），呢啲老鬼就算手頭上冇足夠數據，往往識得聞到陣除，提早收數，行先別人一步，為銀行避免好多呆帳損失。例子就多咯，聽退休賓架Ｂ講三十年來嘅古仔，甚為過癮！講住三隻先：
（一）一位資深美國銀行家負責地區業務，與一位菲律賓大戶往來好耐，某次結伴同遊，去加州打高球，菲律賓大戶話不如去拉斯維加斯玩番一日。陪人客去拉斯維加斯賭場，本乃美國禁忌，驚俾人講說話，但彼此咁熟，去一日就一日啦。一去到，賭場酒店鬼咁好招呼，上下打點晒，啲ＶＩＰ招待令銀行家受寵若驚，但菲律賓大戶則視之若理所當然，派頭十足十，豪氣到不得了。返到香港，美國賓架立即下令重新核對銀行對大戶嘅借貸，以「慎重漸進」步伐收數，收到九成幾，馬可斯垮台，呢位大戶周轉不靈，彎咗。
（二）賓架Ｂ做靚仔嗰陣，跟師傅去尖沙嘴拜訪一個上手交低嘅客戶，一入辦公室就見到一個神位射住門口，心諗神位擺響屋企嘅啫，點解會擺喺公司寫字樓？返到銀行，師傅就話：「呢位客戶盤數好似幾正路，但我懷疑佢係撈偏門嘅，個神位令我起疑心，你去查真啲。」賓架Ｂ打探咗幾個星期，知道客戶另有其他收入，向師傅報告，師傅立即叫佢收數，停止往來。
（三）賓架Ｂ老友賓架Ａ去到印尼探訪客戶廠房，受熱烈招待，但佢發覺一年前借出一筆termloan五百萬美元，好似唔對路噃，當時話明係買德國機器，點解廠房內所見，好多都係台灣機器？工廠雖然生產正常，但係客戶分明出蠱惑，而且自己銀行監察不周，出咗一身冷汗，返到香港，立即逐步減少往來，收數至上。