唔講都唔覺，《武藏傳》（1998年）原來係PS年代之作，續篇竟然要喺7年後嘅PS2上推出！PS2版《武藏傳II》，故事同前作雖然冇乜關連，不過爽利嘅操作系統，同《三國無雙》式嘅勁多Hit、群毆式打法，真係一開機叫人好難收手；闊別多年、「武」者回歸，當然學咗新武功啦！今次《武II》最特別之處，係竟然可以好似小說嘅姑蘇慕容，臨陣「偷招」，再以彼之道還施彼身，招式燦爛打到飛起！
記者：陳國輝
故事背景好傳統！一個壞蛋集團為咗稱霸世界，於是乎想控制能量之源「魔蒸石」。心地善良嘅Mycella公主為咗設法阻止，佢使用「終極魔法」將有能力拯救世界嘅英雄──武藏（Musashi），從另一個世界中召喚過嚟，並由此展開冒險之旅。
升級系統多變數
玩過上集都知，主角武藏其實係一名二刀流劍術高手，攻擊武器當然係焦點所在！喺戰鬥期間，武藏必須要拎到「五輪劍」，包括「地之劍」、「水之劍」、「火之劍」、「風之劍」及「空之劍」，利用每把寶劍獨具嘅「秘奧義」，使出特殊招式，玩家先可以擊倒首腦並順利過關！另外，武藏會根據戰績而升級，攻擊力、體力、魔力及眼力等幾方面，玩家都可以選擇性咁調整。但要謹記，當你愈集中增加攻擊力或魔力點數嘅時候，其他能力值就會相對被拉低！
臨陣「一閃」偷招
如果遊戲全程齋拎住武器劈來劈去，你可能覺得略嫌單調。《武藏傳II》注入咗新穎嘅「偷招」技巧，主角懂得觀察敵人動作，然後學習，繼而收為己用，喺同類遊戲中絕對少見。不過操作方式就相當唔簡單，遇到敵人先按住「L1」掣儲滿「眼力」，然後走近敵人身邊，待敵人向你攻擊嘅一剎那，再按「□」掣（有啲似出《鬼武者》嘅一閃）！如果時間配合嘅話，畫面就會即時要求輸入一串指令，成功輸入嘅話就學到敵人招式。不過，並唔係每一類敵人嘅招式都可以學習到。例如，鐵甲人能夠將手臂伸長旋轉，武藏就唔能夠學習。
「抱抱」攻擊好搞鬼
其實SQUAREENIX嘅「FF」系列都玩過唔少次多人合作攻擊，藉此增強殺敵威力；《武藏傳II》就將呢種玩法變得更有創意！無論任何時候，只要武藏走向敵人附近，就可以將其抱起；表面上兩者好似二合為一咁，實情只當佢係一件武器！「抱抱」嘅招式主要有三種：第一係直接當武器用，但只能攻擊某一個方向，兼顧唔到後方；第二係將手上嘅敵人拋起，再揮刀一圈殺死周圍敵人；第三係拋高敵人，然後一腳踢走佢。至於攻略要訣，「抱抱」會令角色行動變慢，易受攻擊，群毆咪用！不過扣血能力下下過百，對皮厚血多敵人就最啱！
公司：SQUAREENIXCO.,LTD
類型：動作
玩家：1人
推出日期：7月7日
$428
(C)2005SQUAREENIXCO.,LTD
DREAMSTORE （25753285）
地址：灣仔道188號東方188商場256號舖
