呢期突然多咗好多嘢從天而降，可惜唔係橫財，而係人見人怕嘅鋁窗、石屎，最高紀錄一日六七宗。
住宅樓宇現有四萬幾幢，鋁窗數以千萬計，負責監管私人樓宇安全嘅屋宇署話，唔少私人樓宇嘅鋁窗用咗二十幾年，日久失修，係鋁窗飛脫嘅主因，近日暴雨連場，令問題惡化，尤其係無敵海景近海樓。
鰂魚涌太古城咁啱呢幾樣條件都中晒，咁咪好危險？之不過，唔使咁驚住，蘭西睇到啲資料，原來太古城管理公司，舊年搵咗承辦商，為各單位做鋁窗檢查，到今年五月底，屋苑一萬二千六百九十八個單位，已經檢查咗七千八百個，管理公司又已展開第二輪鋁窗檢查行動，針對未做嘅四千幾個，以及覆檢第一輪檢查中有問題嘅單位。
電郵地址：[email protected]