二三線基金股近排好多都冇運行，日日係咁跌，一副洗倉格。噚日再嚟一單倫敦大爆炸，今日唔使問阿貴大市都唔慌好睇。經紀黃話，根據數年前紐約911經驗，呢類恐慌通常會持續多日，千祈咪咁快走去博反彈。
近期股價異常硬淨的建滔化工（148）噚日停牌，原來搞先舊後新配股，雖然建滔本身向來有一班芬佬捧場客，但撞正呢排工業股氣氛唔多就，加上又整單大爆炸事件，睇嚟配股未必搞得掂。
建滔近兩周由23元樓下抽上，最高見過26元，停牌前報25元。經紀黃話，建滔噚日朝公布以每股23.75至24.75元配售4000萬股，但到晏晝重未搞得掂，認購仍然未夠數，結果喺4點零鐘將配售價調低至23至23.50元，但無幾耐就證實倫敦遭恐怖襲擊，真係唔敢諗芬佬會點反應。
直至噚晚經紀黃與小初摸酒杯底之時，仍然未知建滔批股一事最終搞成點？
慕容小初