日本人氣偶像組合w-inds.出道以嚟，獲得唔少本地fans支持，上星期喺數碼港商場搞咗個w-inds.MV放映會，吸引咗二千名fans參加，佢哋齊齊睇住偶像嘅MV揮動旗仔大合唱，場面真係壯觀。
氣氛媲美演唱會
上星期五香港特別行政區政府資訊科技辦公室同數碼港合辦咗第一屆「數碼電玩馬拉松」，而當日喺數碼港商場舉行嘅「w-inds.agehaVIDEOCONCERTatCYBERPORTGAMESMARATHON」就係其中一項活動，亦係全港最大型嘅日本偶像放映會。嗰日一早已經有唔少fans冒雨喺場外排晒長龍等入場，而場內更有成二千fans參加活動，墟冚程度絕對唔會比w-inds.喺日本會堂搞嘅演唱會遜色。
被誤會扮權相佑
本地嘅w-inds.fans一向非常齊心，喺播放MV嘅時候，佢哋個個都忘晒形咁揮動手上嘅旗仔，又好投入咁跟住大銀幕上嘅偶像唱歌，場面非常熱鬧。當日亦有fans上台試玩w-inds.跳舞電玩對戰遊戲，大會亦當場抽獎送出w-inds.日本演唱會門券。
雖然w-inds.冇現身，但三位成員預先錄咗片段問候本地fans，重話希望盡快嚟香港同fans見面。而組合主音橘慶太最近喺訪問中話：「我媽咪係權相佑fans，佢見我近期成日去健身，竟然話我係想模仿權相佑練到好大隻，搞到我哭笑不得啦！」