有線驕陽電影投資二千五百萬開拍民初奇情片《犀照》，由馮德倫同鍾欣桐（阿嬌）主演，呢個劇本係有線節目部執行董事徐小明撰寫，導演係林健龍，佢哋會去湖南鳳凰城、張家界及浙江橫店取景。
據知，片中有一場衝天大火災嘅戲，因為保險昂貴嘅問題，有線索性買咗橫店附近一個三層高、佔地幾萬呎嘅廠房嚟燒，徐小明笑話：「拍完後重可以將間廠賣番出去。」
扮老實商人
套戲嘅背景喺三十年代，故事講述阿嬌係一個受西方教育嘅律師，因為接咗一單奇案，追尋之下重去咗另一個空間。
而馮德倫就扮演老實商人，離鄉別井出城做生意，俾人謀害入獄，在逃獄之後識咗阿嬌，而阿嬌就決定幫佢平反打官司，之後兩人做埋情侶，重有唔少感情戲。
馮仁昭問徐小明親熱尺度去到邊，佢話接吻呢啲例牌嘢一定需要，不過主要係睇阿嬌同馮德倫接受程度去到幾多。
