暑期正式開始，最高興莫過於去旅行，不過唔少人有個隱憂，就係要搭長途機！如果你唔係坐1A，即使沒有42吋長腿，依然會膝頭頂到實一實，頸梗膊痛雙腳麻痹；撞啱隔籬左右有多口仔甚至「狐仙」，就更加痛不欲生，好彩市面有唔少長途機良伴，大家喺萬呎高空中，自製獨家1A經濟位！
記者：張銘恩
攝影：周旭文、陳盛臣
模特兒：Zita
上半身——美容舒壓任你揀
十幾粒鐘流流長，坐住喺位上腰骨都梗埋，腰墊、頸枕等細件物件此時大起作用，鍾意睇書睇戲之人重會搞到眼矇矇，咁一個按摩眼罩就真係唔少得！
超時空眼罩
困在機艙的壓迫感真係超難頂，呢個眼罩有按摩功能，可針對穴位紓緩眼部疲勞，而且內置大自然音樂，如鳥聲、海浪等，帶你走出狹窄的機艙。
$368（d）
摺得眼罩
一上飛機就要大覺瞓之人必備！周遭的人食飯睇書都好少理，總之任何光線都唔會影響同周公之聚。
$12（a）
吹氣頸枕
MIS吹氣頸枕，摺起後重細過雙CD，小巧方便，薄絨面提供的手感亦不錯，最大好處係非常抵買。
$16（b）
兩用小枕
旅行專用小枕，內芯使用了透氣管，感覺清爽，備有可調校繩索，可固定在飛機椅背上作頭枕用，有需要時又可以作腰枕用。
$190（c）
踢走熊貓眼
與其坐響度冇嘢做，女士們不如爭取時間美容！此眼罩可以發出熱力，並以氣墊及震動模式為你按摩，紓緩眼部神經，減少熊貓眼出現！
$688（d）
軟綿綿公仔
俾咁得意嘅U形馬騮仔箍住自己條頸，一定冧到有覺好瞓！重鬼咁軟綿綿，細路仔都好啱用，直頭舒服到唔捨得除！
$69（b）
吹氣骨頭腰墊
Mendoza吹氣腰墊，骨頭形設計正好承托兩邊腰間，上到飛機先吹氣夠晒慳位，而格仔布套就可以拆下清洗。
$98（c）
經濟艙症候群預防貼士
經濟艙症候群的出現，是由於長時間坐在狹窄的空間，缺乏活動，血液循環不流通，引致血管栓塞，輕則引起呼吸困難、胸痛，嚴重時會陷入昏迷，甚至猝死。
想避免以上情況，除了使用合適產品，亦可從其他方面入手。可能的話，至少每隔2小時站起來活動一下；如怕麻煩，不妨嘗試在座位內做一點腳部伸展或踏步運動。此外，謹記勿穿尖頭或高跟鞋，盡量穿緊身襪子和鬆闊的鞋子，減少腿部血液出現栓塞的情況。同時亦應多喝清水，避免血液濃度過高。
下半身——最緊要預防機艙症候群
近年愈來愈多有關經濟艙症候群的事例，聽到都驚，因為可以隨時攞你命！為免慘劇發生於自己身上，除咗要多啲走動之外，其實亦有不少產品可以幫到大家，即睇睇！
護膝促進血液循環
唔少膝頭患有痛症的人坐兩粒鐘就會發痛，日本Comefree這個護膝可發出遠紅外線，加速血液循環，保暖同時可支撐關節，減低痛楚。
$128（a）
專用壓力襪
專門設計畀坐飛機用的X-Socks，於腳眼、小腿等位置加有壓力物料，防止機艙症候群出現，而腳趾、後踭位就加厚作保護，經防真菌處理，並可自動調節合適溫度。
$145（e）
按摩拖鞋
唔想全程機焗住對腳，不妨買定對拖鞋上機着，呢對毛毛拖不但鞋底夠厚夠舒服，最特別係可以開掣震動按摩腳掌，防止血塊積聚。
$198（d）
按摩孖寶
坐得耐，頸梗膊痛應運而生，惟有出法寶幫自己鬆下，橙色搖搖棒可做到捶、敲功能，綠色滾球棒就啱晒按摩大髀、小腿肌肉，凸起膠粒剛中帶柔，刺激穴位促進新陳代謝。
$198/set（d）
殺時間消閒玩物
如果冇咁幸運可以隨時隨地瞓到覺，十幾粒鐘的機程真係慘過俾蟻咬！解救方法惟有自己搵娛樂KillTime，主觀地盡快度過整個機程，除咗可以傳統啲帶本讀物之外，以下電玩應該亦可以幫到你。
潮女NDS
任天堂的NDS（NintendoDS）亦係另一熱爆遊戲機，其TouchScreen靈敏度高，MiniGame玩法多變，尤其養咗任天狗的你又點可以咁殘忍置之不理，梗係要帶埋佢上機，餵嘢食兼同佢散步啦！
$1,080（行貨）（f）
解悶王PSP
潮人必備萬能解悶王PSP（PlayStationPortable），集遊戲機、電影、音樂播放和瀏覽圖片等多媒體功能，重可以與同行友伴玩多至16人的網絡對戰，唔單止提供到不同娛樂，重分分鐘可以靠佢溝到鄰座美女！
$1,980（行貨）（f）
20GB私家影院
機上播電影，永遠只有坐前排的可以清楚睇到，最Perfect當然係自己設置私家影院啦！ICHIBANAMP-22便攜式多媒體放影機，內置20GB記憶體，閒閒哋存到十多套電影，3吋半LCD芒幾清晰，淨係帶住佢成程機都唔會悶！另備拍攝（不過只得160萬像素）、MP3播放等功能。
$3,980（d）
其他好幫手
要舒舒服服在狹小的空間生存，其實好多濕星小物可以發揮莫大作用，唔覺唔覺幫到忙，超強冷氣、「狐仙」等機上大敵，一一搞掂。
抗「狐」噴霧
隔籬位坐着個「狐仙」，都幾難頂！惟有出動DHCAromaToilette西柚香橙味或薰衣草玫瑰味噴霧，噴於枕頭上，香氣可持續3小時。
$150/50ml（g）
快乾毛巾
瞓完一覺發覺自己油光滿面，梗係要洗番個面清醒吓，想衞生啲當然要自備毛巾，TRITON以超微細纖維織成的快乾毛巾，經防菌處理，吸水又輕身，附有防水袋隨身攜帶。
$78（40×50cm）（a）
簡便沖劑棒
坐飛機除了咖啡茶汽水等飲品就別無他選，想有益啲可以自備夏桑菊、花旗參、葡萄糖等沖劑，事前將沖粉放入棒中的網格內，然後放入水中攪拌，即刻飲得！
$49（b）
超輕風褸
航空公司提供的公用毛毯未必人人想用，呢件只重150g的Montane風褸最啱飛機上保暖之用，超薄身摺起後變成一個波仔，只有掌心般大細。
$630（a）
售賣點
（a）毅成戶外用品旺角西洋菜南街134-136號二樓23900020
（b）PROTREK油麻地彌敦道466-472號地下C1-2舖23328699
（c）西田百貨沙田新城市廣場3期2樓26941111
（d）JCLadies銅鑼灣時代廣場832舖31022718
（e）Pro-camfis銅鑼灣時代廣場602舖25062211
（f）DreamStore灣仔東方188商場256舖25753285
（g）DHC旺角新世紀廣場1樓1B舖26283922