香港電影資料館近日舉行「粵片魅力之男」展覽，展出胡楓、曾江、謝賢、鄧光榮、呂奇和已故影星吳楚帆及張瑛的珍貴劇照和電影片段。原來修哥當年每一封fans信也親自回覆，難怪俘虜萬千少女芳心。
由今日開始至十月九日於香港電影資料館舉行的「粵片魅力之男」展覽，免費招待市民參觀。年屆七十三的胡楓（原名胡繼修）年輕時曾是萬千少女的偶像，由於舞藝精湛，有「舞王」美譽，他所到之處均有大批女fans追捧，風頭絕不比他的契仔黎明遜色。
對於被視為粵片魅力型男，修哥謙稱各花入各眼說：「我都唔知自己魅力喺邊度，不過，當年得到影迷認同及支持，我都好多謝佢哋。」
提議搞花旦展覽
未知修哥當年的fans可像黎明fans般瘋狂？修哥笑說：「唔勁得過黎明，以前fans比較含蓄，頂多只係拖吓你隻手，望吓你，又或者寫信畀我。以前我每日都收好多影迷信㗎，我會親自覆信，寄番張相畀佢哋，同埋寫幾句問候語。」修哥對影迷的細心體貼，其實亦正是他魅力所在。
修哥又說：「我覺得今次呢個展覽好有意義，因為過咗咁多個年代，好多後生仔女可能唔知張瑛係邊個，呢個活動正好提醒佢哋有啲咁嘅人物存在。我覺得除咗男藝人之外，有關方面亦可以舉辦花旦或者係喜劇泰斗展覽，介紹吓梁醒波、伊秋水或者鄧寄塵呢啲咁有代表性嘅人物。」
採訪：戴彩煥
