芬佬股、賭股、唔夠秤嘅三四線股，唔多妥。早段和黃（013）升0.85元（埋單升0.15元），長實（001）早段升0.75元（埋單反跌0.45元），兩隻燕子未能帶來1個春天，恒指跌119點。期指多日來高水終於斷纜，低水3點。
好多時，期指高水唔代表個市有得升，呢幾日又係。𠵱家變為低水，傳統智慧話係主凶唔主吉，好可能又錯，希望在人間。細細注，搵啲跌得速嘅藍籌C輪，都有機會贏幾個菠蘿包。
中移動C輪4934：中移動（941）兩周前見30.10元，昨收27.85元，跌0.55元，估計就快跌夠，低買C輪4934，輕注怡情，博反彈。11月中夠鐘，輪價17.7仙，溢價4.3%，槓桿率15.7倍（有效9.5倍），引伸波幅21.5%。想買賣易啲，槓桿率大啲，可揀4998。
國壽C輪4853：國壽（2628）收5.25元，微跌1格，末日C輪3794散27%，散到平水，時日無多冇得守。國壽如果再跌，估計又會有護價盤頂住，低位買4853，11月15日夠鐘，輪價38仙，溢價6.3%，槓桿率13.8倍（有效8.1倍），引伸波幅25.9%。同4943一樣，如果做嘢，怡情輕注比較啱。
章盛