巨額製作費、黃金組合炮製嘅《強戰世界》，戲飛$25一張！票房直逼三千萬大關、擁有「實甩甩」飛車場面嘅《頭文字D》，$25都睇到！最正係7.14先至正式上畫嘅《慌失失奇兵》，更加係提早一星期率先喺早場現身。冇緊要吖，平時返學耕田咁早都係咁起身啦，𠵱家只不過係十點幾開場，完全冇難度！所以暑假一到，各大戲院連平日都有早場開畫。記者採訪當日係星期二，旺角百老匯朝早十點半場賣飛超過7成，認真旺場！
記者：馬慶武
攝影：伍慶泉
Models：Johnny、Bonnie、Katie&Kitty
朝早睇戲當「晨運」
唔使等星期二都可以睇平戲！其實每逢周末、周日，百老匯院線都已經有早場開。但係暑假一到，「暑假精」放監出籠，早場即時變得受歡迎，百老匯院線同各MCL戲院連平日都會開埋早場，重係當紅首輪猛片，戲碼同正場完全一樣。
百老匯院線市場部嘅發言人就話：「暑假早場反應好好，尤其係新戲上映嘅頭一個星期，入場人數同正場差唔多，所以相信暑假早場每年都會繼續開。」不過記者採訪當日發現，原來除咗學生之外，重有好多晏晝先返工嘅大人睇戲當「晨運」，嚇飽、笑飽、過足睇戲癮先開工。
咁早起身有原因
必旺！《慌失失》優先早場
比夜場票價平一半已經夠吸引，《慌失失奇兵》在7.14正式上畫前更只限早場先有得睇，所以話《慌失失》絕對係近期最熱爆早場好戲。睇早場當然都可以用電話、上網訂飛，不過既然要平，當然要平盡，畀個貼士各位戲迷：據記者觀察所得，睇早場嘅戲迷多數唔會訂飛，只會有少少人預先一晚買定，而買飛人流就集中喺開場前15分鐘出現。所以就算要睇最旺場嘅《慌失失奇兵》，早少少去到買飛，一樣十拿九穩揀到靚位。
旺區戲院全天候$30
大熱天時遇着冷氣房，的確好多人寧願畀多幾廿蚊瞓多兩粒鐘。朝朝10點都未起身嘅夜鬼其實一樣可以睇平戲，因為有啲戲院為咗吸引戲迷，實行全天候購票優惠，平日無論早場夜場都係$30，而且呢幾間戲院都唔算太吊腳，只係「匿」埋喺旺區，行兩步就到！
百老匯電影中心：星期一至五票價$35
地址：油麻地眾坊街3號駿發花園
豪華戲院：全天候票價$30
地址：旺角道4號（23990363）
暑期合家歡早場逐個捉
首輪猛片，$25入場睇最啱數！
谷票房$0睇場戲
如果你連廿皮都唔想畀，其實暑假檔期重好多唔同單位都會搞一啲電影宣傳活動，送吓飛畀戲迷。
谷飛單位：
萬寧
即日開始，身穿校服或出示有效學生證，到萬寧用八達通消費滿$50，就可獲MCL電影換票證一張，送完即止。（22993381）
Hyundai
凡購買指定型號HyundaiMP3Player，連同發票可換領《龍咁威2》電影換票證2張，送完即止。
（31851032）
百威啤酒
於7-Eleven購買百威啤酒產品兩件，加$5.9即可獲《龍咁威2》玩具車一架及買一送一電影優惠票。（27225066）
Neway
憑Neway250分K-FUN可換取《龍咁威2》換票證2張。
（21962196）
新都城中心
即日至7月17日喺商場消費滿$100可到新都城「慌失失奇兵樂園」玩遊戲贏取戲票。於7月9、10日消費滿$800，可換領指定優先場戲票2張。（31943200）
黃金海岸
於指定日期內於商場消費滿$300，憑即日發票可換領《虫不知》電影戲票乙張。
（24526566）
Dr.Martens
於指定店舖購物滿$500即獲《虫不知》戲票1張，滿$800可獲2張。
（23696881）
中銀信用卡
即日起至7月20日，用中銀UPoint及ynot信用卡簽帳3次，每次滿$300或以上，可憑簽帳存根於指定戲院免費換領《虫不知》戲票兩張。
（21083288）