日本國腳中田英壽去完台灣，搞到台灣名模林志玲同孫正華爭寵，前日佢嚟香港，同林志玲前後腳喺君悅酒店出現，關係耐人尋味。
識途老馬
前日傍晚中田英壽又靜靜雞去咗澳門玩，有二五仔同馮仁昭報料，話佢同幾個日本朋友去咗澳門新填海區第三區嘅金龍夜總會消遣，金龍嘅小姐知道中田英壽嚟咗，爭住入佢房陪坐，好鬼死受歡迎；有人認出係中田英壽，想搵佢簽名，但就俾佢啲企喺房門口嘅保鑣擋住，唔畀啲閒雜人等出入。
據二五仔講，前晚中田英壽同日籍友人玩得好盡興，凌晨時分先至離開，之後有人帶咗兩個夜總會小姐出街。馮仁昭都有啲奇怪點解中田英壽識去澳門夜總會玩，二五仔就話中田英壽係識途老馬，佢係澳門夜總會常客，不過冇乜人知咁解啫。
