八方噚日好忙，因為連去兩場國慶酒會，中午埃及駐港領事館喺禮頓山間靚會所舉行小型party，請到新任政務司司長許仕仁主禮，肥許自己住禮頓山，噚日兩次過門不入，冇返屋企；佢用流利英文講港埃關係，相當得體，八方問佢位新政務助理Adeline黃靜文，呢次係咪肥許上任後第一次出席外交活動，Adeline話唔係，許生前日已經去咗賀加拿大國慶。
唔等唐唐主禮已走人
肥許噚日少咗咳，因為試緊新藥，希望藥到病除啦。
埃及人慶祝國慶比較低調，美國佬就誇張好多，佢哋俟晚喺灣仔君悅嘅大ballroom舉行酒會，新總領事未到位，由副總領事坂上瑪蓮做東，請咗財政司司長唐英年主禮，超人李嘉誠都畀面出席。
唐唐六點半先至到，盛傳會離開政府嘅律政司司長梁愛詩唔等佢就急急腳走人，八方問梁司長係咪真係同煲呔拜拜？佢答得好特別：「我今日未走。」呢個答案同「今日唔知聽日事」比，又進咗一步，咁係咪即係話聽日或者後日會走呢？
詩姐姐講得咁有趣，八方於是滿場飛收料，行會成員周梁扮唔知，不過就同八方報告黨友梁劉柔芬嘅最新消息，話梁太周一已返港，噚日已經參加黨團會議，面色好好，重肥咗少少。
傳聞已決定提早辭職
周梁口密，八方問另一位行會成員廖長城，佢反而叫八方問番梁愛詩。如果老董重在位，長城應該係律政司司長嘅接班大熱，但家陣煲呔做特首，情況可能有變，連馮華健都唔知有冇份。
一時間搵唔到答案，八方轉移目標，搵李柱銘、李鵬飛分析形勢，飛哥話律政司份工對梁愛詩已經毫無挑戰，佢走都唔奇；馬丁就話，詩姐姐都一手推冧咗香港嘅法治制度，留都冇意思。講兩講，馬會主席夏佳理埋嚟趁高興，馬丁話，想害佢（夏佳理）冇得做律政司就一齊影張合照；夏主席一聽到，馬上拉住馬丁同飛哥，八方一聲OK就拍咗呢張「罪證」。
唱完美國國歌，先見到林D9，佢同詩姐姐成日拍檔，但係都冇乜料爆。最後有一位高人唔抵得，細細聲同八方講，詩姐姐真係做唔到尾，已經決定提早辭職，至於因乜就唔知喎。
爆料熱線：29290000、27860099
報料傳真：26239278
報料電郵：[email protected]
