恒指跌53點，收14124，最低曾見14101。個市再跌些少，估計會定得住，可以諗吓喺14000邊邊買嘢，揀C輪炒，博反彈。
恒指C輪4746：恒指C輪最活躍嘅係4723，其次係4746。結合壽命、溢價、風險因素，4746比較諗得過。隻輪10月尾夠鐘，輪價19.4仙，溢價2.8%，槓桿率19.7倍（有效12.3倍），引伸波幅16.8%。
想快趣見功，即係贏輸速度快啲同幅度大啲，揀3900，8月尾到期，輪價14.3仙，溢價1.2%，槓桿率28.2倍（有效19.4倍），引伸波幅13.7%。要有思想準備，隻輪1日之間，高低波幅可達2成。昨日，恒指高低只相差0.42%，但隻輪高低已相差14.8%。
滙控C輪4706：滙控C輪4706係同類輪中，成交金額最勁者。隻輪10月下旬到期，輪價20.9仙，溢價4.4%，槓桿率59.3倍（有效22倍），引伸波幅12.6%。睇槓桿率，好爆，不過滙控係相對移動慢嘅股票，揸此輪畀4.4%溢價，正股牛多1段日子，此輪溢價收縮，容易輸錢。買滙控C輪，實際啲，揀溢價較低者，風險會比較小。
章盛