容祖兒昨日身穿露臍裝在深圳出席宣傳演唱會的記者會，心情大好的她不時說笑，甚麼「新馬仔着短褲」和「癲癲得得又一日」盡出，十分搞笑。祖兒又謂要向李克勤和徐小鳳偷師，希望練得好口才帶動現場氣氛。
容祖兒昨日在深圳寶輝商務酒店舉行「容祖兒showup05深圳演唱會」記者會，宣布本月十六日在深圳寶安體育館舉辦一場演唱會。
睇影碟練口才
祖兒身穿紅彤彤露臍裝亮相，她表示這次是其處女深圳個唱，不僅製作費千萬，還要以二十架大貨車運載舞台音響燈光和服飾，而之前香港演唱會中的飛馬及鑽石面具都會再登場，Boy'Z和關智斌則任表演嘉賓。
祖兒昨日心情大靚，說話亦十分鬼馬，她說：「我到時着嘅衫係之前冬天系列，雖然都好少布，但我諗會香汗淋漓，前排嘅歌迷就good啦，因為佢哋會摸到飛馬隻馬腳，真係新馬仔着短褲（露出馬腳）呀。」
祖兒又覺得自己口才不好，希望個唱前練好口才，以帶動現場氣氛。祖兒謂會多看影碟偷師，她尤其崇拜李克勤的風趣以及徐小鳳的笑位拿揑準確，她說：「克勤好知觀眾反應位喺邊，我自己講嘢『甩甩咳咳』，但有時反高潮位啲人又鍾意，真係癲癲得得又一日呀。不過口才都冇得急，我咁多年都係咁，突然好好啲人都驚啦。」
按摩師爭侍候
祖兒表示大會會安排一間有露台有廚房的套房給她，讓她曬太陽和睡個好覺。問她會否去按摩，祖兒卻謂以前曾有恐怖經歷，故只會叫按摩師上房服務，她說：「有一次我冇化妝set頭，入到間房有三個按摩師搶住按我隻腳，Mani（霍汶希）喺隔籬叫留低兩個按摩師就算，走時成間舖頭嘅人排成兩行同我saygoodbye，我以後叫人上房冇咁危險。」
採訪、攝影：曾小嘉