無綫節目《殘酷一叮》噚日喺將軍澳電視廣播城錄影，邀請咗謝霆鋒、鄭少秋做嘉賓評判，噚日嘅表演嘉賓之中，嚟自澳門嘅「長腿哥哥」Dino踩高蹺彈結他唱《高妹》，得到七十七秒最高分數，不過佢嘅絕技未能夠成功挑戰上集台主Tara，結果Tara憑一首《UnchainedMelody》獲得八十七秒成績冧莊。
對Twins畫像輪流唱
三位女子參賽者劉思韻、劉沛盈、劉沛餘以前衞打扮組成組合獻唱日文歌，估唔到秋官口花花話：「我見日本啲女仔唱歌冇咁密實，又打出個胃，下次你哋唔使咁密實㗎。」另一參賽者黃冠聰就化咗豔妝赤腳演繹《波斯貓》，重打出條腰扭吓扭吓。
參賽者當中就蘇智超最鬼馬，佢分別將Twins成員阿嬌（鍾欣桐）同阿Sa（蔡卓妍）嘅畫像擺上台，之後開始扮方力申唱歌，眼甘甘望住阿嬌幅畫，可惜唱到一半被叮，評判之後叫佢繼續扮，佢就扮埋鄭中基望住阿Sa唱歌，不過克勤睇完就話：「呢啲過咗啦，下次搵啲新意思搞吓。」
