呢一排不但有細價股無厘頭勁升，亦有細價股無厘頭下跌，兼且跌幅頗大，噚日嘅表表者就係華藝銅業（559），大跌31.18％，收0.64元，而且唔係乾跌，成交相當大，有1139萬元。
經紀陳話，佢特別留意華藝，原因係隻股向來有炒家睇場，貨源頗為集中，但噚日一公布先舊後新配股，股價就跌成咁，認真耐人尋味，一啲都唔簡單。
配股並無周街派
華藝今次係以先舊後新方式，每股88仙，配售1.11億股，集資9768萬元。近排甚少二三線股批股集資，而華藝今次嘅size唔算細，照計應該有大戶肯認頭，批股先至可以搞得成，而之前亦聽唔到有人周街問人要唔要貨。
但奇就奇在華藝昨日復牌，只係頭半個鐘頭重叫做守得住，跟住股價就如江河日下，跌到四腳朝天。照計要咗貨嘅投資者，就算諗住炒短線沽貨都唔會急成咁，搞到帳面即時輸錢咁肉酸，所以覺得成件事好古怪。
慕容小初