呢個暑假最熱門嘅話題，一定係已通知利物浦要離隊嘅謝拉特去向新聞。究竟呢位英格蘭中場會選擇繼續留喺利物浦，定係轉會去車路士或者皇家馬德里呢？最快一個禮拜內有答案。
謝拉特喺續約問題上同利記談判破裂，車仔隨即出價三千二百萬鎊買佢，但畀利記拒絕咗。雖然係咁，謝拉特離隊機會仍然好高，事關睇番博彩公司開出謝拉特喺下周中對TNS場歐冠盃外圍賽落場嘅賠率，有成八倍咁冷，唔踢就熱到僅得一點○六倍；另外佢過檔皇馬同車仔嘅賠率，分別係二點七五倍同埋三倍。
球迷𠵱家關心嘅問題，就係謝拉特真係離隊，究竟會去車仔定皇馬，但我求大俠就認為，皇馬會啱佢多啲。車仔話晒係利記死敵，加上佢個位同林柏特同馬基列尼叠叠哋，或要花段時間適應；但去皇馬就唔同，施丹退休在即，中場隨時由佢話事，而且又有碧咸、活基治同奧雲三個鄉里，有晒照應。
點都好，謝拉特級數咁高，簽到佢嘅球會，肯定戰力大增。