沉寂咗一排嘅自動售賣機近期又再重出江湖，尤其喺apm通宵場紮晒營，侍候夜鬼。雖然暫時港產自動售賣機比唔上日本咁多花臣，但其實同樣花樣多多！不過衰在無乜宣傳，所以好易畀人走漏眼，問親身邊啲朋友，個個都唔多知佢哋搞乜，又或者「係咩？真係有部咁嘅機？」唔……既然係咁，今次我哋就行勻港九新界，將幾部最潮嘅自動售賣機推介畀你哋！
記者：黃藹瑩 攝影：陳盛臣
Models：Blanche、Kuen
你最想要咩自動售賣機？
熱辣辣即刻食
1.Bye-bye！熱辣魚蛋機
呢部位於觀塘嘅魚蛋機原來係04年出色之作，啱啱推出市面之時可謂搶晒風頭，火車地鐵沿線都好似有佢嘅蹤影。不過𠵱家已經買少見少，兼且傳聞執笠㖭！
地點：觀塘地鐵站
2.貴！貴！水滾杯麵機
杯麵機喺商場比較少見，反而比較多出現於各大專院校，離開咗校園一排的人士可能冇用過，兼且連見都未見過！不過杯麵機選擇唔算多，只得5種味道，而且標價$8，比超市同款杯麵$6貴，咁真係要好肚餓先至考慮喺商場食喇！
Alison：「個杯麵好夠熱，味道同超市買嘅冇咩分別！不過我唔會喺商場食杯麵，因為商場到處都有嘢食啦，FoodCourt、食肆乜都有，做咩要捱杯麵咁慘呢？」
地點：觀塘apmL6
3.口淡淡！熱咖啡機
呢部咖啡機好易認，因為佢機身有張好大嘅王宛芝相！不過唔知係咪王小姐的魅力唔多夠，定係啲咖啡同熱朱古力唔多掂呢，小記發現一路都冇咩人行埋嚟幫襯。
Matthew：「杯朱古力都好燙口喎！不過啲味道就好似淡咗啲，出面街嘅紙包朱古力重好飲過佢喎！」
地點：沙田火車站出口
悶得滯幫襯消閒機
1.隨地開卷！賣書機
呢部賣書機係JP@（三聯）出品，當初推出目的係畀鍾意閱讀嘅人士唔使受時間束縛，喺商場或書局關門後仍然可以買書。機內嘅書主要以消閒書為主，部機亦都會顯示出「暢銷書」字樣，等你唔喺書局都可以知道今期咩書係最Hit；至於比較學術性的書就暫時欠奉嘞！
地點：觀塘apmL6
2.得啖笑！算命機
呢部叫「真神之口」的自動算命機，操作都好簡單，只需投放兩蚊硬幣，然後再放自己隻手入去部機中間的空隙，等10秒就即有結果。呢個真神之口講嘅嘢都幾大路，不過估唔到幫襯的人都幾多噃，大家算完都係得啖笑。
結果顯示……
同一個人試玩2次的結果居然唔一樣！阿真神講嘅嘢都幾大路：「長期坐着會影響你的健康」，鬼唔知咩！兼且有一張話你有80歲命，另一張就話你得40歲命，咁信邊個至好?!
地點：沙田火車站出口
即㩒即用補給機
1.識得走佬！Under機
唔好誤會，部機唔係淨係得Under賣，重有襪、遮同布腰帶賣！呢部Under機係Baleno的自家出品，早在幾年前已經出現為人民服務，全港只有兩部。不過因為租約問題，兩部Under機隨時周圍走去停泊喺港九新界唔同地方，例如上期停沙田、今期停中環。若果你急起上來真係要搵佢嚟換底，可能會有一定難度！
地點：中環德輔道中In-base
2.打爆即叉！增值卡機
若果自己張電話漫遊卡、飛線卡無晒Saving，郁吓就要去番電話公司買過張，實在費時失事！和記3呢部增值卡機賣的都是$98或以上的增值卡。不過小記觀察了一段時間，完全唔覺有人會行過去買卡，甚至乎連睇都唔睇一眼，睇嚟部增值卡機的實用性都唔係好大喎！
地點：沙田火車站出口
3.嘟爆八達通！香水機
全香港就只得呢一部香水機，裏面賣的TommyHilfiger香水都唔係新款，不過可能就係冇咩特別至穩陣啦！機內每支香水的售價$180，同出面一樣。不過要用八達通嚟嘟$180，分分鐘嘟到爆卡㗎！
地點：觀塘apmL6
