睇ＣＮＮ新聞講國際歌星為貧窮國家請命，全球舉辦「Live8」音樂會，數十萬人聚集在蘇格蘭愛丁堡示威—MakePovertyaHistory，你話唔感動就係鐵石心腸，但歐美歌星對非洲似有罪惡感，有啲為過去殖民地、奴隸貿易嘅歷史感到羞恥、慚愧嘅味道。呢次Ｇ８國家領袖在愛丁堡開會，主題係撤銷貧窮國家欠下富裕國家、世界銀行、國際貨幣組織嘅債務，總數有幾多？冇乜一定嘅準確估計，幾百億美元就一定冇走雞。呢啲錢喺邊度嚟㗎？講到最後，梗係出自富裕國家納稅人嘅口袋啦。
英國財相白高敦與首相貝里雅對撤銷債務之議，最為熱心，美國總統布殊就無可無不可。既然Ｇ８國家咁有錢，為幾百億美元撇帳，係負擔得起嘅，不過左丁山就唔同意，撇帳之後，貧窮國家，特別係非洲，就會突然間可以消除貧窮？就算撇完帳，Ｇ８及其他國家會唔會繼續經濟援助窮國呢？當然會。世界銀行、ＩＭＦ以後會唔會繼續借錢畀窮國呢？當然會。咁樣，十年八載之後，係唔係又嚟一次撤銷債務呢？
窮國之窮，四十年前可以將責任推在殖民主義身上，四十年後，啲窮國重有乜好賴呀，賴人不如自我檢討，軍事獨裁、貪污腐敗、政府無所不管（管親就有貪污機會）先至係窮國與非洲之致命傷。佢哋現時嘅經濟，甚至衰過英國佬統治嗰陣，有乜好講。爭氣之前殖民地如新加坡、馬來西亞、印度以至印尼，何需Ｇ８照顧、可憐？好似緬甸呢啲軍人獨裁國，閂埋道門自己玩，軍人日日強姦村婦，免佢債務簡直係冇天理，經濟援助呢啲國家只會延續軍人統治。非洲國家獨立後四十年，好多都唔似樣，就算啲歐美歌星日日義唱籌款，唱到喉嚨破，都無補於事。