鬼武者系列相信好多人都玩過，甚至係通宵達旦咁玩，擁有咁多Fans自然對續集特別關心，可惜自從《新鬼武者》公布後，CAPCOM官方發布消息唔多，大家尤其關心嘅主角更係神秘人，直至今年E3遊戲展，先至有機會睇到新作畫面同試玩，最近《新鬼武者》試玩版抵港，主角蒼鬼終於由黑暗中現身！
記者：許福合
《新鬼武者》繼前作織田信長為主線後，重新開始嘅新故事，主角蒼鬼係德川家康嘅兒子，同時又係豐臣秀吉養子，所以故事同人物設定均屬重新創作；此外，遊戲畫面亦明顯作出了升級，好細緻，相信係有史以來最靚嘅《鬼武者》，預計會於明年年頭推出！
過場CG七成畫質
今次《新鬼武者》試玩版，香港CAPCOM表示同E3時展示嘅係同一個版本，須要以Debug版PS2來玩；遊戲內容大約可以玩到頭2版，另外亦提供一個特別Battlefields模式，讓玩家跳過劇情，直接向Boss挑戰。由於遊戲仍然製作中，試玩版明顯有好多Bug同未完成嘅地方，例如一開始就會出現巨大幻魔，經過筆者一輪閃避，竟然發現原來玩家係「不死」，被怪狂射都唔會死！另外，走到部份地方後，會突然發現唔能夠再前進，筆者就估計係未「加上」阻礙物。不過講到最特別，就不能不提動畫CG，全部都刻意被整蒙，大約只能見到畫面7成左右，可能想替新作保留一點神秘感！
Select轉換角色
雖然畫面做過啲「手腳」，不過去到遊戲部份，就絕對認真，試玩時可全程試用到各種遊戲系統同道具，《鬼武者》呢類遊戲最注重視點，筆者就留意到新作主要由3個視點組成，例如一開始對戰幻魔，就用咗接近第一身視點操控，睇落幻魔就特別巨大；而一般的打鬥場面，則會以第3身進行遊戲；另外當走到特別地點，視點會改為固定式，方便玩家搵路同道具！
今集可讓玩家隨時轉換角色，當玩咗無耐，女角十兵衞就會加入，玩家只要按Select就可以隨時轉換，講力量同招式之多，蒼鬼一定贏晒，不過要比攻擊速度，十兵衞就有好大優勢，而且相當靈活㖭！當出現同伴後，當然唔少得使出合體技，當有足夠能量時，按下「△」就可以出合體招式，這種合體技破壞力比普通打法勁得多，打Boss最啱。
殺敵靠一閃
講到《鬼武者》嘅精髓，當然不能不提一閃，相信唔少《鬼武者》Fans都下過一番苦功，《新鬼武者》喺招式方面，沿用咗《鬼武者3》為基礎，不過好多敵人都係血多皮厚，重好鍾意圍抽，勝敗關鍵就係一閃成功次數，尤其打Boss或限時賽，出得愈多一閃就能提高清除敵人速度，另外還有多種出招方式，儲氣出招、連斬當然唔少得，另外亦可配合Joystick方向出招，攻擊變化好多，配上華麗出招畫面，真係令Fans流晒口水。
間中會突然出現「鬼武俠」畫面，要求玩家指定時間內清除敵人，提議多使用一閃同按「○」使出大範圍技能，加快殺敵速度。若果符合完成條件，就會出現寶箱，打開後就會出現「智力」遊戲，要喺指定步數內駁通兩邊，完成後就有機會獲得武器裝備！戰鬥時，玩家亦咪忘記吸魂用以升級武器同防具，而今集更加入角色升級系統，打倒敵人獲取經驗升級，同時，亦可從多項能力值中選擇作升級，玩家有機會訓練一個「自己」嘅鬼武者。
遊戲資料
開發：CAPCOM
主機：PS2
類型：動作
遊戲人數：1人
推出日期：2006年首季
售價：未定
(c)CAPCOMCO.LTD