天文台噚日發出酷熱天氣警告，咁嘅天氣蘭西自然好想放假，享受吓陽光與海灘。不過，啲富豪喺享受之餘重會諗吓商機，好似有「東方夏威夷」之稱嘅海南島，近日就規劃開發一個新旅遊景點：三亞海棠灣，希望海內外財團過去投資。噚日《文匯報》頭條新聞報道，話香港首富李嘉誠同佢個仔李澤楷會一齊合作，在當地建造一座超豪級、可媲美阿聯酋嗰間帆船酒店（BurjAl-ArabHotel），重話若果項目落實總投資唔少於二百億元人民幣。
消息係咪真蘭西唔敢講，事關佢兩父子名下咁多間上市公司，又咁多私人投資，究意係咪佢哋投，點樣投都好難講得清。所以，噚日和黃、電盈同盈大幾間上市公司發言人都只能講一聲「不予置評」。