老董落台，好多當年唔明解嘅問題都一一有答案，好似高官問責制，八方就聽到全部係老董嘅傑作，與北京無關，主要係向陳四萬奪權。
可惜問責制急急推出台，連人腳都唔夠，開壞個頭，正式係未見其利，先見其害，最後要搵公務員回朝，收拾殘局。於是就有人問，不如取消高官問責制，恢復以前公僕制，反正公僕犯錯，都一樣要問責，只係冇咁易下台啫。
不過，當年有份推新制嘅孫明揚就話好難行返轉頭，因為大家都習慣咗高官係政治任命，有權亦有責。咁又係，自從行咗新制後，好多個高官中箭下馬，葉劉係第一個，跟住有阿松、楊永強，最後連老董都自身難保，咁好玩，又的確好難話叫停。
八方聽聞肥許對呢個走回頭路嘅建議興趣相當大，分分鐘喺佢份乜嘢政制檢討白皮書會攞出嚟諮詢大家意見，當然曾蔭權點睇最重要，因為佢最近提議要開政務助理同民建聯培養治港人才，又話要開第二層問責位；重有要走返轉頭要問班政黨肯唔肯制，唔係話唔要就可以取消。
傳真︰2623-9278
電郵︰[email protected]