會計Ｍ一家四口，於七月一日揸車去灣仔福臨門飲茶，預備飲茶完畢就去參加七一大遊行。佢過往兩年都如是，由維園出發，佢覺得太辛苦，中午歎完茶在灣仔插隊，行到滙豐銀行就散水，最為舒服，一來可以出一身汗，二來可以精神上支持民主普選，教育一對仔女開放心靈，係最佳親子活動！
今年去到莊士敦道福記附近，見到有二三十架大旅遊巴士停晒響度，阻住晒，搞乜鬼呢喂？後嚟先知道，甚麼上午舉行嘅慶回歸大遊行會行到灣仔散隊，有好多組織「抽人」、「派人」參加，旅遊巴就係接佢哋走嘅，真係照顧周到，唔怪得之可以調動三萬人。會計Ｍ話：「明年不如索性搞大佢，橫掂曾憲梓有咁多錢，叫埋霍老爺一班人捐，年年七月一號辦一個類似美國七月四日慶祝國慶大遊行嘅活動，一來可以吸引遊客，二來等中央電視台有片段可以當新聞播出，三來壓住七一民間遊行嘅氣勢，好值得愛國人士投資啫！」
相形之下，民間遊行屬自發性，冇廠商會、學校逼學生參加，冇中華總商會招待全聚德自助餐，冇旅遊巴士等你坐，仍有一萬一千人上街，算唔錯咯。老董既已下台，大家消咗啖氣，加上啲教會團體各有主意，算啦。
會計Ｍ一家跟大隊行到長江中心門外，見到十零位醫生模樣之人，反對港大醫學院冠名為「李嘉誠醫學院」。會計Ｍ個細仔問：「乜嘢叫做冠名？」一解釋就話長咯，不知從何說起。會計Ｍ剛收到一啲學長通知，問佢可唔可以在八月一號之後捐款畀母校，爭取政府嘅配對資助（matchingfunds），會計Ｍ覺得自己捐得幾多吖，頂多一萬幾千，而且學校連年請求校友捐款，已經有啲donationfatigue，大家都已經打定輸數，知道港大一定贏晒，如果李嘉誠捐畀港大啲錢，全部或者一半喺八月一號過數嘅話，港大唔使做嘢都可以穩袋政府嘅二億五千萬，唔使叫啲校友捐錢。