SAMSUNGSGH-E530紅雞蛋勁冧女

玩手機有邊個唔貪外形新鮮？旋屏、扭芒已經唔算特別；的骰、纖薄更加係主流要求。想外觀突圍而出，真係好唔容易！最近先達水貨嗰邊返咗隻「紅雞蛋」──SAMSUNGSGH-E530，令身紫紅色機面，少女味濃；獨特「圓碌碌」順滑線條，更是一眾女性手機玩家最愛；剛落場，Sales話十個問機、九個女仔！呢期最當「紅」女性手機，真係非佢莫屬。記者：陳國輝
攝影：伍慶泉
ImageGirl：家琪

其實，大玩少女Feel嘅摺機已經出過唔少，如韓國Toplux、台灣OKWAP亦試過加入女性生理期及卡路里計算功能，但係成功彈起嘅例子，則以黑白芒年代嘅女性手機──SAMSUNGSGH-A408最經典。E530將多年前A408嘅玫瑰Look，一改而成全曲線形態，表面變得光滑無比，加上機頂及機底部份慢慢收窄，外形就好似一隻蛋咁款！重量只有85g，摺合時嘅長度亦僅約43mm，的的骰骰，質地非常滑溜。

■內置100萬像素鏡頭，變焦時好流暢。

■補光燈當照明電筒用都得，非常光猛！

90MB影相聽歌

配置於機面，係一個100萬像素鏡頭連補光燈，可透過26萬色TFT內屏影人、影風景之餘，重可利用6萬5千色OLED外屏玩自拍，最高解像度達1,152×864，已足夠曬張靚相放落銀包！值得一提，相機重支援影格仔相功能，同Nokia3230嘅《格仔Cam》類似，有2×2、3×3兩種格式（100萬像素），玩落都幾有LOMOFeel！
MP3按鍵方面，E530今回不設機面專用掣，必須先進入目錄才能點選；雖然冇以前咁方便，但好處係縮減咗機身長度，令總長只有86mm，保留咗女性手機應有嘅圓滑同美觀外形！至於聽歌功能，貫徹自選歌曲名單以及三款播放介面，喺不支援插卡情況之下，內置容量達到90MB，足夠把成張專輯搬過手機！

■機側影相掣成粒米咁細，夠晒趣怪！

■內置幾款播歌介面，全靠五方向鍵操作。

■90MB內置容量可收錄影片、音樂及鈴聲。

■支援加相框兼特殊效果，增添娛樂性。

■備有2×2或3×3格拍攝模式，照片好有LOMOFeel！

■支援藍芽「掟」相、短片或任何檔案到另一手機。

襯色絨布機袋

機身配搭咗顏色好Sharp嘅紫紅及銀白雙色，比起以往齋玩銀色當然Colorful好多！另外，跟機重附送紫紅色絨布袋及同色手機繩，唔單止實用，行出街重一定靚到絕！據Sales講，其實E530重有幾款顏色，包括橙、綠、藍同金，全部都係搶眼兼少見嘅色系，但重未知幾時先返貨，如果有心買嘅話，不妨畀少少耐性等多一陣啦！
E530既為女性Design，功能方面當然緊貼女性嘅要求！除咗內置卡路里計算器，重備有三款遊戲，當中一款叫《BOBBYCARROT》嘅Java遊戲以益智為主，玩家負責將「蛋蛋」放置到指定位置，並盡可能喺最快時間內完成過關。呢類講求腦筋，唔使打打殺殺嘅MiniGame，當然都係最啱女仔玩！

■配合機身設計主題，重內置一款「生蛋蛋」智力遊戲。

■機側睇落好似雞蛋咁圓碌碌，頭尾重玩收窄。

■跟機有珍珠白色立體聲耳機，專用嚟聽MP3。

■「5」、「8」兩數字鍵刻意突出，唔怕會㩒錯。

■罕見附送同色絨面機袋及手機繩，擺明主攻女性用家。

Profile

制式：GSM900/1800/1900
體積：86×43×26mm
重量：85g
相機：100萬像素鏡頭
通話時間：300分鐘
備用時間：200小時
主要功能：26萬色TFT內屏、6萬5千色OLED外屏、15張連環快拍、格仔相、MP3播放器、3D立體聲、內置90MB容量、藍芽
售賣點：T-OneMobile（26289090）
地址：先達廣場地下G60號舖

■$2,980