「嗰時準備結婚，又讀緊書，好多planning（計劃）。好大打擊，人生計劃好似化為烏有咁，最慘係唔知幾時死。」三十八歲的黃遠志，九八年購入粉嶺一物業，以數十萬元積蓄支付首期，每月供款一萬四千元，一向有購買醫療保險的他因想節省開支，五年前停止續保，豈料三個月後證實患上血癌。
「冇諗過藥費咁貴」
「嗰時（保險）都已經買咗幾年，好唔好彩，冇諗過自己會有咁嘅病，我重係超級負資產，層樓又唔係想甩就甩，我就算無條件唔要層樓，銀行都唔肯啦！」當時在貿易公司任職的他，與未婚妻月入約四萬元，屬低收入中產一族，對於眼前的龐大醫療開支一籌莫展。由於他中途「斷保」，結果只得二十多萬元的危疾賠償，首三個月單是注射干擾素就花去三萬元，「買保險嗰陣冇諗過藥費咁貴，諗住冇嘢做，廿幾萬都可以慢慢搣，但原來只係夠買藥。」
病發後身體虛弱，黃遠志不能工作，卻要面對每月一萬四千元的藥費。「嗰時靠太太二萬蚊多啲，除咗食藥重要水、電、煤呢？好多支出。」
黃遠志其後成功爭取撒瑪利亞基金的資助，不需繳付藥費，自言已是幸運一群，「有啲人真係山窮水盡，要借貸度日。」他說，當局現時每年檢討藥物的資助計劃，一般中產未必符合申請資格，「有啲病人就諗，咁不如唔做嘢，攞綜援啦！」
贊同助低收入中產
身體狀況已穩定的他，曾嘗試再投保，但不獲保險公司受理。對於衞生福利及食物局局長周一嶽表示會協助低收入中產，黃遠志甚表贊同，「中產人士過往都有交稅，但係到有病嘅時候政府完全畀唔到援助，如果患咗重病，啲藥會好貴，就算有幾十萬積蓄，都會好快用完。」
本報記者