陳冠希（Edison）上個月去淺水灣時，被雜誌影到佢拉開條泳褲，疑做出不文動作嘅相片，但向來我行我素嘅Edison一於少理，噚日下晝繼續出戰淺水灣，同另外五壯士赤膊上陣，一齊喺沙灘嬉水曬太陽，順便畀雙眼食吓冰淇淋。
傾偈曬太陽
噚日下晝三點，Edison同DJTommy等幾個朋友喺淺水灣出現，Edison上身赤裸，下穿及膝泳褲，一行六人坐喺近海邊嘅位置曬太陽，Edison重同班朋友一邊傾偈一邊煲煙，冇耐佢就執嘢離場，行去攞車時，佢沿途主動同啲美女弄潮兒打招呼，不過當發現有記者在場，Edison就即刻對住鏡頭周身「印」，表演吓hiphop舞姿至上車，實行擺出一副唔怕你影嘅姿態。
此外，Edison前晚喺數碼港睇老友陳奐仁演出港台音樂會，提到日前有報道話佢同張栢芝去日本入住同一酒店，雖則二人冇相會，但報道就講到佢兩個有啲嘢咁，Edison重同一女伴同行，佢前晚就話：「我去拍廣告同做Levi's嘅工作，我唔知栢芝同我一間酒店喎，我做嘢有人喺隔籬，唔覺得要解釋佢係邊個。」