政務司司長許仕仁坐正，即時宣布，由於任期得兩年，因此不宜有藍圖大計，只係搞掂政制發展，同埋西九龍分豬肉，經已交貨！
咁又係！老董時代，東一項大計，西一項藍圖，全部吹水假大空，好學唔學，學埋啲共黨作風，於是焦頭爛額，七年零就收工！
各種承諾俱空中樓閣
公務員治港，梗係要務實！不止肥龍得兩年，當奴都只係得兩年，因此，若然競「選」時嘅「承諾」，甚麼加開「政務助理」，甚麼設最低工資，一一兌現，咁咪豈不是同老董時代大動作大藍圖自取滅亡一樣？
所以，都係咪嘞！競「選」承諾，通通空中樓閣！增設所謂「政務助理」，會分化公務員人心；增設最低工資，又會分化僱傭關係，危害社會和諧，經過「慎重考慮」，各項競選「承諾」，紛紛不宜推行！嫻姐及蔡素玉等八百「選委」，若然條氣唔順，有俾當奴呃嘅感覺，最好就係搵壽爺投訴嘞！
若然兩年之後，當奴再要競「選」連任，又唔怕喎！到時一樣係中方爺爺吹雞話事，冇錯，上趟係明「坤」你咁今次你又敢唔敢唔投呢？
未來兩年，所以最大嘅急務，就係大事裝修前港督府，另擇吉日，宣布當奴重新「還都」上亞厘畢道，並由全港道教佛教領袖，加埋天主教首領陳日君，齊齊舉行開光祝福聯合大典，三牲酒禮，祭埋天地，其他大計藍圖，全部讓路，咁從此香港想窮都幾難咯！
肥龍坐鎮政制發展，反為呢一瓣，有少少走棧！咪話過想擴大直選同功能議席嘅？由三十席對三十席，加到六十對六十，甚至一百對一百，睇怕唔係冇得傾。喺增加功能議席方面，以肥龍充滿國際化嘅高尚文化氣質，睇怕點都唔會開埋啲新議席畀維園阿伯、「一九六七年反英抗暴受害愛國同胞家屬聯誼會」，同埋「馬寶道蔡菜子愛國Fan屎會」啩？
文化藝術界有望加位
反為香港歌劇界一席，古典音樂演奏界一席、影評人又一席，另外，意大利文愛好者、占士邦電影文物收藏家協會、小說《達文西密碼》文學鑑賞社呀等等（要係睇英文原文嗰隻，睇中譯本唔受），喺肥龍嘅統治下，以功能組別身份入立法會有望喎！
唐家璇公然侮辱港人，喺政制問題上，香港人係時候出聲駁斥嘞！
傳真︰2623-9278
電郵︰[email protected]