大價股收窄買賣差價，股價上落速度好似慢咗啲。改買賣差價，市場人士好快就會習慣。要升嘅股票始終會升，要跌嘅股票始終要跌，毋須大隻講。美國啲大價股，以前每1/8美元，即係0.125美元，跳一跳，𠵱家0.01美元跳一跳，美股一樣交投暢順。
中移動C輪4998：中移動（941）最低28.65元，收29.10元，由跌0.30元變升0.15元埋單，跑贏聯通（762），跑輸網通（906）與中電信（728）。中移動前一排升咗好多，短期反覆難免，可趁每次回落幾毫，低位買C輪，等正股彈番幾毫上去，套現離場，低買高賣，實行密食當三番，或者當兩番。
炒賣最佳對象之一係4998，12月中到期，輪價21.9仙，溢價4.7%，槓桿率13.3倍（有效8.4倍），引伸波幅20.9%。炒賣對象之二係4934，呢隻買賣活躍程度不如4998，數據則靚過4998。
網通C輪3457：網通新聞多多，收11.65元，升0.35元，吼回吐買C輪，冇乜得揀，3457正路之選，明年1月夠鐘，輪價1.34元，溢價7.5%，槓桿率8.7倍（有效5.7倍），引伸波幅29%。網通C輪得3隻，3457係交投最活嗰隻。
章盛