踏入七月份，波友如果冇裝寬頻電視，想搵直播賽事睇都好愁，但我求大俠知道重有一個選擇，「收費台」會免費直播中國超級聯賽。
中超聯一直喺收費頻道播放，但喺七月就會趁馬季歇暑，喺18台頻道都播埋，每個賽期日都會直播一場比賽；好似聽晚咁，直播嘅大連實德對青島中能，前者目前位居中超聯榜首，而且今季話要捲土重來，收復上個球季嘅失利。
不過，我求大俠查問過，同時間開賽嘅波，兩個頻道就會直播兩場唔同賽事，等球迷有多一個選擇，而且免費頻道每個賽日只會直播一場（一周約兩場），總算對之前有波友花錢買晒收睇全季賽事直播套票公平啲。
其實，中超聯水準唔算太高，但對一啲睇慣直播賽事嘅波友嚟講，真係好過翻睇上季啲四大聯賽，況且遲吓有東亞四強賽，提前了解國足成員狀態都好！不過，到八月馬仔同四大聯賽陸續開鑼，想睇祖國波就要畀錢嘞。