細細個聽阿爸阿哥講話要儲郵票、儲各地鈔票，𠵱家就眼見同事朋友儲扭蛋盒裝蛋。近期至Hit儲嘅莫過於食玩兼備嘅菓子玩具（CandyToys）！盒中食物唔係重點，大家都貪其內嘅精緻小玩意。鬼咩，啲菓子玩具製作咁認真，今日登場嘅十二星座菓子玩具重識發埋夜光，點可以唔買返屋企呀？
記者：趙善怡
攝影：陳盛臣
ImageGirl：蚊
角色菓子玩具靠名氣
芸芸菓子玩具中，角色化嘅玩意就最多人撐，皆因角色本身已有自家Fans，橫掂買開佢啲嘢，就梗係掃埋菓子玩具啦！加上玩具造型有根有據，角色齊花款又多，想唔儲足成套都唔得啦！
夜光公仔任你Match
今日上場嘅12星座夜光系列共有12款。每個公仔所環抱嘅小星形咕𠱸，黑夜裏都會發出光芒。12隻10厘米高垂掛公仔分成「米奇與老友記」及「小熊維尼與好友」兩組，盒上的透明框設計方便你找出相對的星座！
十二星座今日登場
同肉桂狗一起歎茶
Cinnamoroll肉桂狗係住響「咖啡·肉桂」店內，所以呢款菓子玩具以各種蛋糕果撻作主要場景，而肉桂狗嘅好朋友Cappuccino、Mocha等就會喺不同嘅場景內玩耍嬉戲。
售價：$148一套，共4盒不同款式（a）
海盜從良要入屋
人氣熾熱日本漫畫《OnePiece》海賊王，講述有關海盜古仔，最近喺香港勁Hit！男主角路飛當然係Fans搜購之選，不過負責醫人嘅小鹿索柏亦有唔少擁護者將佢據為己有！
售價：$160一套，一套12盒（b）
打造迷你火車路
Tomy出品迪士尼火車系列，每個角色負責一節卡車，如松鼠仔負責控制火車頭，而高飛狗就主力做站長。另備有兩條路軌，集齊6款就可連接出環迴火車路玩火車捐山窿。
售價：$18.9一盒，共6盒不同款式（d）
攻陷少女心
早前OL爭崩頭嘅情景菓子玩具最近有新Items返。像真度超高嘅有百貨店、10大美食巡禮等；而喜歡貓貓狗狗嘅亦有份，無論你係有養開定係恨養嘅，𠵱家都可擁抱心頭好啦！
愛上《老友狗狗》
6隻可愛小犬每隻身高有大約7.5厘米，姿態表情栩栩如生。首推Cute爆八哥，不過隨着電影《老友狗狗》快將上映，片中主角日本柴犬定必成掃貨焦點。
售價：$220一套，共6款（b）
盡「飽」眼福
呢批仿做食物嘅菓子玩具，從日本北海道至沖繩各地，搜尋出10大美食作全面睇，製作複雜如烤炸物到簡便至生果都一一呈獻，要你盡「飽」眼福！
售價：$20一盒，共10款（c）
抵入名牌貨
一度斷貨嘅仿名牌用品潮流菓子玩具，可滿足拜金族於名店Shopping嘅無限慾望！除咗有鞋有袋，重連埋包裝盒同紙袋，Packing都做埋，好Grand！
售價：$80一套，共9款（a）
人形蠱惑貓
日本Yujin出品，由造型作家朝隈俊男設計嘅擬人化花貓，樣子極為搞笑。不同種類、不同形態及表情嘅7厘米高小擺設好生動。另備有MessageCard！
售價：$48一盒，共6款（a）
男孩有理
好多男生儲菓子玩具嘅瘋狂程度絕不嘢小，但佢哋儲啲乜都係有迹可尋嘅，或許係由細到大都喜愛變形金剛嘅，又或者因為近排興《頭文字D》，所以趁熱入貨！
食正潮流車仔玩具
《頭文字D》電影剛上映，其菓子玩具事實上已興咗好一陣子。故事中主角們所駕駛嘅車全有提供，就如相中就係首領拓海嘅愛車！
售價：$30一盒，共6款，一套$198（a）
深入侏羅紀
最近嘅恐龍展吸引咗唔少市民前往欣賞。其實花費不過30蚊就可安坐家中細味侏羅紀時代。系列中速龍、三角龍、暴龍及梁龍4款。
售價：$23.9一盒，共4款（d）
變形金剛系出三傑
Kabaya出品HyperGalaxy變形金剛共有3款，GalaxyConvoy、GalaxyConvoySuperMode及MasterMegatron。相中係身高11厘米、由貨櫃車車頭演變而成嘅GalaxyConvoySuperMode。
售價：$30一盒，共3款（a）
哥斯拉入侵香港
哥斯拉係日本人嘅驕傲，靠佢打進荷李活而揚名於世！哥斯拉菓子玩具系列將其從1954至2003年之間嘅演變一一重現，重配備有關場景，猶如置身其中！
售價：$280一套，共12盒不同款式（b）
菓子行情直擊
玩具店店員Tommy：「𠵱家啲菓子玩具出得好快，款式層出不窮！啲客都係睇吓近排興乜就買乜，好似最近上《Batman》同《頭文字D》，咁有關嘅貨就好賣啲；而通常啲女仔就鍾意收集啲貓貓狗狗嘅菓子玩具嘞！」
菓子玩具收藏家珍品大晒冷
有年半儲菓子玩具經驗嘅Joyce就對迪士尼出品情有獨鍾。Joyce：「我好鍾意迪士尼各個家族成員㗎！為咗快啲知道有咩新產品出，我會周不時上網搵吓啲最新消息，一係就去旺角啲玩具店碰碰運氣，話唔定會撞正佢有新貨返！」
售賣點
（a）D-2Toys（27713822）
旺角西洋菜街1N-1S兆萬中心203號舖
（b）TotoToys（64259919）
旺角皆旺商業地庫B3
（c）ToyHouse（23842888）
旺角西洋菜街1N-1S兆萬中心1字樓120舖
（d）總代理 萬信有限公司（24164499）