呢期新盤名門原為虎豹別墅，雖然開價好高，但仍然熱賣。最新消息係賣咗超過二百伙，套現近五十億。發展商長實當然笑到合唔埋口，但有一個人睇怕就一啖啖血咁嘔。邊個？當然係老虎女胡仙。
蘭西記得一九九八年，金融風暴正烈，胡仙惹完官非又陷於財困，官非有梁愛詩幫手，欠債就冇人打救，結果先將星島畀咗何柱國抵債，更連祖業都要賣埋畀李澤鉅。成間虎豹別墅，只係收番一億。
小超人就叻，執件筍貨，補九億幾地價，計埋二十億建築費，總成本大約三十億，頭一日開盤賣二十二伙已經套現七億幾，全部賣清估計收番一百億。聽講佢哋宣傳費都用咗億二，畀經紀嘅佣都可能成兩億。你話收一億嘅胡仙知道，係咪嘔血？
其實蘭西覺得胡仙都係一個人物，可惜呢位華文報業女王，因幾億債務轉唔到身，事業祖業一夜斷送。虎豹別墅在一九三二年落成，當時建費都要千五萬，六十幾年後一億賤賣，而又七年之後，人家就賣一百億。世事幾殘酷呢，難怪有高人話，呢座別墅風水唔好，真係似地獄。
電郵地址：[email protected]