正在拍攝《本能》第二集嘅荷李活女星莎朗史東（SharonStone），前日現身捷克溫泉名鎮卡羅維瓦利，出席當地舉行嘅第四十屆國際電影節，佢重好興奮咁上台攞咗個表揚佢對國際影壇貢獻嘅「水晶球獎」。雖然莎姐上台捧獎時表現激動，不過佢話自己近年已經淡泊名利，一於以家庭至上。
捷克前總統撐場
現年四十七歲嘅莎朗史東前日抵埗捷克嘅時候，就着住紅色T恤襯上白色毛毛大衣，之後佢出席頒獎禮嗰陣又換上高貴look出現，一身黑衣打扮行紅地氈即時盡露星味。莎姐之後上台嗰陣重除埋毛毛披肩，露出件吊帶晚裝，非常性感。
大會為表揚莎姐多年來喺國際影壇嘅貢獻，重即場向佢頒咗個「水晶球獎」㖭，所以莎姐上台捧獎時都表現得非常激動。而當日莎姐老友羅拔烈福（RobertRedford）同捷克前總統哈維爾亦到場祝賀。
不過，莎姐最近接受記者訪問嘅時候，就話近年自己已經淡泊名利，佢話：「咁多年我睇通咗名利係好脆弱，我亦接受自己開始年老嘅事實。喺我現在嘅生命中，家庭係最重要，不過我暫時重未想同任何一個男人發展戀情。」