全球主要國家嘅樓市,齊齊興旺,搞到格林斯潘要出口術,希望樓市唔好升得太多太急。連番加息之下,樓市升勢放緩,尚未下跌,不過個別城市地區,炒得太高嘅,就會跌番,例如英國首相貝理雅去年高價買入倫敦豪宅區五房大宅,一年之內就蝕咗近一千萬港元,兩公婆面燶燶。英國首相份人工唔算多,如果貝理雅要搵真銀,不如早啲辭職,效法克林頓周圍去演講,一星期一次,一次三萬鎊,每年都收番百五萬鎊啦,重可以寫回憶錄,預支版權費呢。假如財相白高敦心急接任,唔知會唔會使陰濕招,令到英國加息,貝理雅咁就更加頭赤咯。
最近英文報紙多咗澳洲、倫敦、新加坡啲樓盤廣告,吹噓位置靚、設計好,而且價錢與香港比起來,便宜好多,於是有人心郁郁,買番一間投資收租都好吖。馬主C睇見澳洲雪梨市中心佐治街(GeorgeStreet)有靚樓賣樓花,諾曼科士打爵士設計(滙豐大廈、西九天幕、赤鱲角機場建築師),鄰近DarlingHarbour,離唐人街不遠,步行二十幾分鐘可到歌劇院海皮,位於維多利亞大廈附近,正噃,立即搵澳洲人馬主N問路,原來馬主N早已買樓在附近,回報率四厘幾,買後一路升值,唔知幾過癮。馬主N在澳洲留學,現在每年去雪梨幾次,對環境十分熟悉,佢話:「睇廣告,地點就一流嘞,不過千祈咪貪大,澳洲人鍾意住在市郊獨立屋,唔多喜歡市中心,只有外國人、留學生會住downtown,所以買兩房單位(細過一千呎)最好租,一房單位(五百幾呎)太細,三房單位太大,比較難租出。我就係買咗一個兩房單位,好好租,從來不愁冇租客。」
往外國買樓,真係要搵當地熟人教路,買錯咗就盞激氣。淨係睇廣告而買樓,分分鐘中招。外國樓盤如果在當地銷情好好嘅,使乜嚟香港搵客呀。