資一千萬美元的暑期電影《頭文字D》，一上畫即大收旺場，更揚言開拍續集轉戰阿爾卑斯山賽道。點知轉個頭，網上已經出現一條玩嘢短片《頭文字T》，重要搞埋朗豪坊「首映」，極速受到網友追捧，網站umovie.net連Server都冧埋。我哋即刻起出幕後製作班底，原來佢哋勢要憑呢條片殺入大銀幕！
記者：黃藹瑩
攝影：陳鈞陶、梁細權
街頭即試《頭T》有幾爆！
套片有幾爆，一於落旺角了解一下！喺星期六人流旺到爆的朗豪坊大電視下面，行街友睇到條片個個眼琼琼！
豆腐車飄移出巡！
小記當日特登叫電影出品人762揸番架戲中戰車出朗豪坊走一轉，發現……
義工製作團$3,000打造
《頭文字T》咁受歡迎，重以為佢哋掟咗好多錢出嚟，原來製作費都只不過係$3,000。導演步飛話其實小有小玩啫，「呢條片係我哋Sell自己Idea同能力的工具，希望會有片商肯投資喺我哋套片，我哋想進軍大銀幕！」
記者上到去umovie.net個竇，發現場地雖細但設備一應俱全，算係一間勁Pro嘅ProductionHouse！導演步飛話，佢哋成班幕後加演員，用咗一日加兩晚通宵火速完成呢條片，「就係日日落雨嗰個禮拜之前的兩日搞掂，我哋算好彩，條片拍完之後冇日好天過！」
下載網址：www.umovie.net
《頭D》VS《頭T》
高橋涼介
立花樹（阿木）
中里毅
須藤京一
李力持幕後操控
李力持係呢條片的投資者兼客串做黃秋生角色，演出極之傳神，最搞嘢係片中間加插咗一段黎明《長情》MV片段，佢一句「我唔鍾意你阿媽！」超搶！「有得玩嘢不知幾好！今次條片加咗好多無厘頭片段，係無關係㗎，不過呢啲咪就係傳統港產喜劇嘅元素囉，以前《歡樂今宵》都係咁㗎啦！」
網友答問大會
Q：戲中兩部車係咩型號？
A：Volvo940同BMWE46。
Q：咁架車係邊個㗎？
A：Volvo係步飛嘅，BMW係合法飛車顧問燈神嘅！
Q：兩部車係咪真係可以用嚟玩飄移先？
A：試過一次意外飄移之後都怕怕。
Q：學鳴係咪特登走去剪咗個阿木頭？
A：係呀！剪完之後重要俾老竇同導演鬧，佢話唔知點帶我出去傾生意喎！
Q：點樣揀中索女Model阿Kendy做女主角？
A：我哋識成200幾個索Model啦，套戲入面嗰個已經係最差㗎喇！（咁巴閉？）
Q：製作片段中點解成日出現輪椅？
A：呢架係導演嘅玩具，當埋係道具啫！不過拍戲嗰時真係可以做埋Track。
Q：你哋班人正職係咩？
A：就係ProductionHouse嘅成員囉！得閒搞吓業餘嘢之嘛！
Google搜尋暴升510倍
究竟條片有幾受歡迎？搞到個Server冧咗就唔在講，所在網站umovie.net要提供埋BT俾大家下載。近期呢條片更成為Newsgroup熱話，十個有七個都講，難怪首映第一日（6月24日）上Google搜尋《頭文字T》僅得400個Result，隔日搜尋即飆升至4,000個，早兩日激增至16,000個，到昨日截稿前更加去到204,000個搜尋結果！一個禮拜狂增510倍，你都咪話唔勁！
網友點睇《頭T》？
Sanni
「條片真係好搞笑，只係某啲取自原本套劇，可能有其他嘢想表演啩？係人哋Forward畀我，我都即刻Forward晒畀我啲Friend。」
劉生
「我重未睇《頭D》，不過就已經睇咗《頭T》，好佩服佢哋咁有諗頭，不過呢啲網絡嘢好難做到主流。」
Yuki
「我都係今晚先去睇《頭D》，《頭Ｔ》我都係響朗豪坊門口睇咗，都幾搞嘢，不過當中我有啲唔明！」
Feli
「《頭T》都幾好笑，睇得出佢哋好認真咁製作，不過始終唔及日本，我上網睇過日本人製嘅短片重好笑、製作重認真！」
