煲呔曾點解咁愛打煲呔？查實係同佢身形有關。曾太噚日接受無綫電視訪問時，踢爆煲呔一嚟自覺生得矮細，覺得打煲呔冇咁累贅；二嚟覺得若果打普通呔，食嘢就好易整污糟，所以都係打煲呔方便啲。
新的特首有百幾個煲呔，曾太不時為丈夫挑選，例如出席莊嚴官式活動，就多數揀啲保守款式，但有時都可以活潑啲，好似粉彩色同抽象圖案。
咪睇曾太為人低調，性格好溫柔，佢都有剛強一面，睇佢寫嘅書法就表現晒出嚟。曾太最鍾意寫行書，一寫更可以寫成幾個鐘，呢份耐力認真驚人；而佢讀書時原來鍾意打波，認真活潑。
同煲呔結婚成三十六年，曾太對丈夫真係無微不至，除咗親自去到香港仔魚市場揀海鮮，又會煲湯蒸魚畀煲呔食，佢話自己以前唔鍾意食苦瓜同茼蒿，但為遷就煲呔都食埋一份，而佢一手廚藝，則係向老爺奶奶學習，因為佢係家中細女，以前唔使下廚。
煲呔日頭好忙，曾太喺屋企打點，幫佢清理吓魚池，個八條錦鯉都有名，條最肥叫楊貴妃，有斑點叫櫻花，煲呔真係有閒情逸致。
眼見丈夫不時俾人批評，曾太一律以平常心看待，頂多剪吓報，夜晚瞓之前哦吓，佢又話做人簡簡單單生活已經好滿足。呢個特首夫人咁知足，唔怪得煲呔一副幸福樣，任佢老婆話自己終於會贏啦。
爆料熱線：29290000、27860099
報料傳真：26239278
報料電郵：[email protected]