acer係台灣電腦老品牌，最近佢轉攻DC市場；最新CR-8530剛落場，感覺絕不能小覷！CR-8530一出已經達800萬像素（1/1.8"）高階級別，再加27mmSlim機身同2.5"TFT（201,000像素）靚芒，真係一擊即中！相機功能基本已同好多大廠薄身機看齊；內置功能極齊全，常用嘅光圈、快門先決，全自動全手動都有齊，金屬機身，非常實淨兼好手感；不過3×光學變焦鏡頭就一般啲（另加5.1×數碼變焦），焦距為36-108mm，感覺唔夠Wide；不過加入5cm微距，同綠光輔助對焦燈，對焦感覺幾中吓！而且對喜歡微距拍攝人士，就更加得心應手。
此外，640×480（30fps）嘅Movie模式，CR-8530亦當然唔少得，影爆卡、儲存格式係勁對應電腦嘅AVI，Movie功能都算攞足分，而且CR-8530重對應PictBridge技術，可以唔上電腦、直駁打印，入門玩家至喜歡。
記者：朱崇德