巴西新星羅賓奴繼喺上周五缺席山度士嘅操練後，前日又玩失蹤，睇嚟山度士都好難喺皇家馬德里身上盡𢱑。
森美爾一季即被放盤
幫巴西攞咗洲際盃嘅羅賓奴喺上周四由德國返巴西後，原本要參加山度士喺上周五、六兩課練習，但突然玩失蹤。明眼人都知佢係迫山度士就範畀佢轉會皇馬；如果呢招唔得，就搵國際足協幫手。山度士賣羅賓奴畀皇馬係遲早嘅事，只係想𢱑多啲，故企硬三千萬美金冇得傾，五千萬美金即賣。
雖則羅賓奴俾人捧到上天，但始終係新人，又未玩過世界盃，相信皇馬唔會儍到出半億美金。但既然佢個心都去咗皇馬，加上個價唔錯，山度士都好難唔放人啩。
講開皇馬，有指佢哋同意將阿根廷後衞森美爾同中場蘇拉利賣畀國際米蘭。森美爾去夏先至由羅馬過檔，但皇馬上屆食白果，佢就孭晒鑊，要黯然離開。羅賓奴第日去咗皇馬呢類超級大會，如交唔到貨，下場可能同森美爾一樣，所以我求大俠奉勸佢一句，咪當正皇馬係天堂。