細個嗰陣，我係一個街童。放學後回家，書包一丟便上街去，玩到身水身汗、污糟邋遢便回家沖涼吃晚飯，睇完《歡樂今宵》便蒙頭大睡，翌晨起床通屋搵番個書包上學去。就算冇街去亦唔多願黐家，寧願在屋企樓下踢波、打波子、踩單車，故此自細已經同樓下看更伯伯好熟、好好傾。
一天如常放學後在樓下玩，發現看更伯伯沒有上班，管理處內坐着一個大眼哥哥，我係一個八卦的細路，於是上前搭訕。大眼哥哥只廿零歲，來此做替工，當時正準備從飯壺中攞出飯餸，見到一個八卦肥仔望住自己，大方地邀請一齊開餐。已不記得大眼哥哥姓乜名乜，只記得他的一雙大眼及一對好粗壯嘅腳瓜囊，從小到大見到的看更都是年紀老邁的伯伯，突然出現一個哥哥，於是連續幾日放學都到管理處找哥哥傾偈。已不記得傾咗啲乜，只記得大眼哥哥一味話我咁細個已經咁肥唔掂，要做多啲運動。大眼哥哥教我做運動，甚至陪我做運動，其實大部份時間我都係企喺度睇佢做運動，佢重一邊做一邊解釋做掌上壓可以鍛煉邊嚿肌肉，做situp點樣先唔會整傷腰骨，由於我只係負責睇，所以仍然係一身肥肉，但大眼哥哥則越嚟越fit，尤其係對腳瓜囊，好似牛𦟌咁一大嚿肌肉……（待續）