上周四晚美股跌得多多哋，但周五升番少少。周五本港冇市，日本及歐洲股市則上升。「魔笛」追魂，唱淡滙控（005），相信影響有限。
新地C輪3445：銀行加息，樓市已經習慣，漸再有起色，賣樓股可以睇好少少。新地（016）走勢，反覆向上，可趁間中新地悶悶哋之時，買啲C輪。新地C輪低位短炒對象，有3445。隻輪12月中夠鐘，輪價45仙，溢價3.4%，槓桿率17.1倍（有效10.5倍），引伸波幅16.6%。
長實C輪3935：近日熱門話題係長實（001）賣名門。假期冇乜新聞，名門銷情不斷出現喺財經版上，居然賣咗接近1半。
有朋友抱怨，由銅鑼灣揸車經大坑道上半山，沿途地產代理經紀「攔途截車」，遇上紅綠燈位或者斑馬線前停車，眾代表一湧而上，敲車窗，派傳單，有啲走到馬路中間，咁樣促銷，好易有交通意外。
萬幾銀一呎買名門，掂唔掂將來至知，但賣樓者點都好過買樓者。長實（001）短期睇好，買C輪對象係3935，10月夠鐘，輪價41仙，溢價1.8%，槓桿率18.5倍（有效13.4倍），引伸波幅13.8%。
章盛