近期幾乎隻隻油股都炒到飛起，但賣盤兼轉型做油品貯存及運輸服務的漢思能源（554），股價自3月份配股後就一直係咁跌，但上周四半年結時，股價反彈7.27％，收0.59元。但比起配股價1元仍然差一大截，價殘可留意。
漢思去年10月收購小虎島石油化工倉庫儲存及碼頭運輸業務，並隨即獲中石化租用5年，涉及金額有成4億幾銀，所以漢思4月份公布截至去年12月業績時，盈利有成1.14億元咁多。
不過，自從漢思大股東今年3月份，以每股1元配售5億股後，漢思股價就被人掟到散晒，但查實公司本身冇乜事發生過，仍然傾緊新的輸送管項目。
漢思去年獲得商品及原材料的最大供應商之一GlencoreInternational購入1億股，本來對方可在5月底行使期權增持，但最終冇做到。經紀黃話，雖然唔清楚人哋點解唔行使期權增持，但反正佢哋重有一個機會，喺8月31日前向漢思大股東行使另一項期權，購入5900萬股，應該冇乜所謂。
慕容小初