瘦骨仙喺娛樂圈都叫做事業得意，但佢嘅癲喪行為就令馮仁昭不敢恭維喇。早排佢喺銅鑼灣一間時裝店試衫，竟然喪到當眾飛Bra透點，都咪話唔嚇人。
事緣嗰日瘦骨仙同助手去到銅鑼灣嘅AO2睇衫，佢一入舖頭就猛揀吊帶背心，之後佢就攞住大堆衫入咗試身室，冇耐佢打開試身室道門，身穿大花薄紗背心嘅瘦骨仙喺鏡前左照右照，喃喃自語話：「件背心咁透，咁點戴bra呀？」話口未完，佢竟然伸隻手入件衫度將個bra掹出嚟，然後將個bra交畀助手拎住，睇怕佢係想研究吓真空上陣會唔會效果好啲。
二千蚊埋單
咁重唔止呀，現晒點嘅瘦骨仙突然伸手入衫裏面托一托個胸，但當時舖頭有成大班售貨員喺度，有男又有女，而且重有唔少顧客在場，個個都俾瘦骨仙嘅舉動嚇到擘大個口得個窿，反而佢就若無其事，施施然入番試身室換衫，而佢就大概用咗二千蚊埋單，由拎bra助手負責畀錢。
瘦骨仙份人咁豪放又咁癲喪，唔係個個男仔都頂得住，難怪佢次次拍拖都被仔飛，係人都被佢嚇走啦！