爵士即將隆重入主，為表親民，實行強政勵治，「督」為民開，將前港督府，隆重開放一日，任由市民參觀！
市民懷念殖民地，情感十分強烈，事前並無宣傳，參觀人數，係咁意都超過八千！好多市民話，欣聞前港督府將會有新主人，所以嗱嗱聲入來睇吓先，以示捧場！
終回歸香港仔手中
前港督府係前殖民地權力中心，風水學上，亦即龍穴所在，點知廢董上台，民族主義情緒古怪大發作，竟然棄府唔住，改名所謂禮崩府，結果求仁得仁，真係搞到禮崩樂壞，董政權敗亡，前港督府遭到人為破壞，現在經爵士大舉裝修，終於回到香港仔嘅手中！
當年，重阿茂整餅，徵求「新名」，有力人士提出，改名「紫廬」，原來，紫廬兩個字，用上海話讀，即是「豬玀」，咁樣兜一個圈來侮辱廢董，呢位高人，都咪話唔詼諧！
豬玀又好，禮崩府又好，董政權八年而亡，私自將港督府篡改為一座禮賓館，證明極為短視！今時今日，當奴係主，唔係賓，董八年恐龍橫行，特區淪為一個謊言大話精嘅「豬玀紀公園」！
當奴裝修禮崩府，又有驚人發現：裏面有大量偷聽器，裝到入主人房，而且驗明全係一九九七年回歸之後所裝設！
咁就好笑嘞！九七後特區冇晒港英特工，大陸國安就有大把，明知當奴即將搬入，邊個咁得閒裝偷聽器？八方認為，此事極為嚴重，令當奴嘅人身安全，蒙上陰影，一定要成立一個有英國MI六及美國中情局參與嘅獨立調查委員會，深入調查，向爵士提交報告書！
董A1暗示呔嫂跟從
咁啱，廢董落台後，董A1不甘寂寞，高調出版一本禮崩府八年嘅「紀念畫冊」（人哋英國佬二十八代港督，住齊喺度，撤出時眼尾都唔留戀，冇出過任何畫冊，你話邊個有氣派，邊個小家？），以前度主人身份，指手畫腳，展示「品味」，並以奶奶姿態，暗示煲呔老婆（簡稱呔嫂）跟從！好在前港督府唔係董A1嘅私產。
爆料熱線：29290000、27860099
報料傳真：26239278
報料電郵：[email protected]