陳奕迅（Eason）噚日喺廣州出席「05出擊——陳奕迅廣州演唱會」記招，宣布今個月三十號會喺廣州天河體育場開騷，個場可以坐三萬人，今次係Eason喺內地第一個個人演唱會，難怪記招有成百個fans同傳媒到場，大會重送咗支聲稱超過百萬嘅野山人參畀Eason補氣。
梁詠琪做嘉賓
大會噚日安排女模拎住寫上Eason過去曾得過的獎項大型海報出場，Eason同十幾個女模同台時，一班記者即刻衝上前，搞到場面有啲混亂。對於第一次喺內地開演唱會，Eason就話揀歌好頭痛咁話。至於演唱會嘉賓方面就有梁詠琪，問Eason點解會搵梁詠琪？佢話覺得梁詠琪夠乾淨，音樂造詣好，笑容甜美。
原來今次Eason嘅演唱會，蔡卓妍嘅爸爸有份做策劃人，噚日喺廣州嘅記者會上，蔡爸爸都有出席，見佢不時關心吓演唱會嘅嘢，真係好落力。
此外，Eason噚日重獲得兩個獎，皆因佢首《夕陽無限好》除咗喺廣東電台嘅中國音樂先鋒榜得到冠軍外，重攞埋華語音樂傳媒大獎嘅「十冠王」獎座，認真可喜可賀。
採訪、攝影：曾小嘉
