鍾欣桐（阿嬌）和緋聞男友方力申之間的關係至今仍撲朔迷離，她坦言以前拍拖沒顧忌，會愛得深、傷得重，但現在她已對愛情變得現實，甚至會為麵包放棄愛情，揀老公也要有經濟能力、有溝通、講信任，這樣才能照顧到自己及家人。
拒為一個人不快
鍾欣桐和方力申自今年初在機場被傳媒踢爆同遊瑞士後，關係撲朔迷離，一時傳二人糖黐豆、一時又傳水溝油。提到與方力申之間的情誼，日前阿嬌在銅鑼灣接受訪問時笑說：「朋友，冇拍拖！」對有關緋聞鬧出不少風風雨雨，她只說：「我覺得好慘，突然間咁多嘢，但冇影響大家嘅友情。」
最怕男友玩失蹤
圈中男女拍拖最易被人唱散，問阿嬌會否擔心？她說：「如果感情穩固，會信任對方，唔會睇嗰啲雜誌，信任係要時間溝通，佢要搵啲嘢出嚟畀人信任，令大家有信心。」
問阿嬌是否「大醋埕」？她即大笑說：「我胸襟好廣闊㗎，不過如果我拍拖，佢有朋友唔介紹我識，當我透明，要我成晚坐到呆呆滯滯，咁梗係嬲啦！唔好十日都唔打個電話畀我，唔好失蹤，好憎搵唔到㗎！起碼知去邊吖，要有交帶。」阿嬌揚言每個女孩都會對男朋友有要求，她亦不例外，她說：「尊重同體諒我，最緊要鍾意我！」
阿嬌承認隨着年紀漸長，在愛情觀方面的確有所改變，她說：「細個時拍拖會冇顧忌，會愛得好深、hurt得好勁，唔知為啲乜嘢，會傷得好重、唔開心；𠵱家人大咗，唔會為一個人唔開心，𠵱家會覺得好現實，唔會只係為愛情而拍拖，會諗將來，佢照唔照顧到我屋企人？有冇經濟能力？係好長遠，唔係齋為愛而愛。」換言之阿嬌是否會視將來的拍拖對象為結婚人選？她笑說：「可能啦，睇對方想唔想。」
問阿嬌會否公開戀情？她說：「都係睇對方想唔想，公開會俾人追訪，又要睇佢係唔係做呢行，影響事業就唔好。公司冇話過唔畀拍拖，只要唔好影響工作就得，我又唔會瘋狂地愛嘅。」那她是否對愛情很理智？她卻笑道：「一時時啦，睇有幾鍾意嗰個人，好鍾意就會控制唔到。」
拒為愛情棄事業
不過，在麵包與愛情之間，阿嬌毫不猶豫選擇麵包，她說：「我唔會為愛情放棄事業，我入呢行都係為屋企人，想屋企人生活好啲，我重供緊樓㗎。𠵱家我覺得拍拖可有可無，身體會重要啲。」
阿嬌續說：「做到咁上下，我諗二十七、八歲拍拖，三十一、二歲結婚，三十五歲前生BB，希望可以搵到個如意郎君，可以養到我。」談到圈中不少靚女都難覓丈夫，她聞言即笑着反問：「我諗自己唔會好難啩？因為我唔係靚女。」
