曾特首話香港電台不宜播賽馬、十大金曲，新政務司司長許仕仁話港台宜多搞小眾節目，兩人訂下大方向之後，工商及科技局局長曾俊華又講港台應面向小眾，商營電台已有嘅節目，港台唔須要再做喎，可以辦多啲小眾節目吖！
何謂小眾節目？即係少人聽嘅節目，唔係人人有興趣嘅節目，商營電台搵唔到足夠廣告支持嘅節目。知道之後，朱培慶處長應該識do啦，例如：
（一）取消所有大眾節目，唔要收聽率，凡係收聽率高過商台、新城嘅節目，一律要cut，第一個下手對象就係《晨光第一線》、《千禧年代》，所有梁繼璋、麥潤壽、車淑梅等節目斬晒先。然後就取消一切財經投資節目，讓晒畀新城財經台。港台辦財經節目，直情係與民爭利啦，應立即停辦。
港台又有唔少新聞報道，其實免費電視、收費電視、兩個商營電台，已經不斷二十四小時播新聞啦，港台應立即取消新聞部，唔好重複。至於港台第二台成日播年輕人音樂，與商業二台、新城娛樂台爭收聽率，唔啱曾局長指示，應立即停辦。
好嘞，廢除新聞部，取消所有重複性嘅節目之後，港台就可以將啲資源重新調配，首先辦一個二十四小時歌劇台，專播西洋歌劇，適合許仕仁司長呢位小眾；其次就係分時段播出不同小眾嘅節目，例如：（一）同志大家樂；（二）菲傭印傭泰傭一家親；（三）道德論理共和諧，請齊儒佛道、天主、基督、伊斯蘭六派人馬輪流講道；（四）書法藝術觀，請曾鮑笑薇女士主持；（五）社團活動大巡禮，日日講中華總商會會長出席之飲宴，香港總商會、中華廠商會、宗親會、同鄉會、街坊會……九百幾個會嘅午餐晚飯活動，適合社團人物收聽。朱處長可以順手炒幾百人，為解決香港財赤作出貢獻，明年會攞大紫荊！