今個星期打開報紙雜誌不斷見到《頭文字D》拍續集的消息，來源我唔清楚，但係想像力豐富，差不多可以幫我寫多四集劇本。有記者打電話畀我叫我回應，我真係口都啞埋，又唔係我講，我有乜嘢可以回應呀？咁佢哋問我覺得點？我話｜嘆為觀止。
首先真係好多謝各位傳媒朋友幫手炒到《頭文字D》咁熱，亦好多謝大家咁關心「續集」的問題。我講過好多次，《頭》片在故事內容上絕對可以拍續集，拍第三集，拍第四集，拍到第十集都得。問題是技術上我們有沒有辦法超越第一集的成績，我指的是在拍攝賽車場面上應用的技術。
我認為現在使用的已是現實上菲林能紀錄的賽車及飄移最好的效果，如果急於拍攝續集，最簡單的方法一定是借助大量的電腦特技，這樣做意味將會出現一部荷李活式的《頭文字D》或是出現一部意圖荷李活式的港產電影。這些都是我最不願意見到的。
通常電影會拍續集是因為第一集票房好，咁有啲人就會覺得唔好理咁多快快手手搞第二集出嚟，總之同第一集差唔多咪得。如果係咁簡單就好囉，但係邊有咁易，特別現在電影市道咁差，如果咁做只會加快電影的死亡。
我個人覺得電影史上最好的續集電影一定是《教父》第二集，突破第一集之餘，更做到令觀眾有翻睇第一集的衝動。