打拳有如社會中的小數族群、邊緣人！不論現實中的拳手或者電影，都好少得到人認同！《擊情》走偏鋒式以女拳手為題材，今年奧斯卡連奪4座金人仔，真係絕非浪得虛名；《洛奇》式奮鬥、《情流心海》的安樂死作結，睇得人心情好沉重！香港好多影評都話《擊》過份堆砌賣弄，你相信《洛奇》式谷底反彈嗎？現實往往是低處未算低！如果睇戲令你對眼嘅淚腺報廢多年，《擊情》或者可令你重拾這份激情！
記者：朱崇德
奇連伊士活都可算是老而彌堅，年屆75之高齡，去年所拍的《懸河殺機》已經令人拍案叫絕！今次《擊情》連奪77屆奧斯卡最佳電影、最佳導演、最佳女主角及最佳男配角，風頭更是一時無兩！儘管有着如此優「勢」，《擊》在香港三月頭上畫時，戲院票房表現只屬一般，如果你當日亦曾失諸交臂，今個星期新返3區DVD，$110低價，絕對值得入場！
三個失意人的故事
拳擊教練法蘭奇（奇連伊士活飾）和好友史克（摩根費曼飾）年輕時曾在拳擊比賽中發生意外，令他倆心有傷痕揮之不去！身邊訓練的拳擊員也紛紛離他而去。直到一位以投入拳擊訓練來肯定自己的女孩瑪姬（希拉莉詩韻飾）出現，開始改變了三人一生！
瑪姬從小在破碎家庭中長大，促使她有着無窮鬥志，瑪姬一心藉拳擊實現自己的夢想，並憑着一份堅韌及執着，終於打動了外冷內熱的法蘭奇，答應做她的拳擊教練！訓練過程中，法蘭奇同瑪姬在對方身上，找到了久違的情感慰藉，並日漸克服心靈上的傷痛；在年半的時間裏，瑪姬超越巔峯，問鼎世界錦標賽冠軍寶座，可惜誰也想不到這將成為她人生中最後的一場賽事！
草根拳手打不出未來
《擊情》以拳擊為引子，講述了社會中最草根的人，為出頭、為自尊而戰的努力！當中演出尤為突出者，當然係最佳女主角的希拉莉，勤奮孝女，做侍應、食二手飯、學打拳，都係為咗領綜援的母親可以生活好啲！擂台之上以命相搏，反而受到自私家人的唾棄！此外，打拳時一樣亦演得出色！據知未開拍之先，希曾以3個月地獄式訓練學做女拳手，加上戲中好多擂台對手，都是貨真價實的「女拳手」，亦是令電影拳拳到肉，極富真實感的原因！
戲中另一喜歡角色，不作他選！當然是教頭奇連，嗰種外冷內熱感覺，演得非常到！加上同希拉莉那種半師徒、亦父女的感覺，亦帶動咗電影中尾段，希被人出矛招打得半死，兩人情感上的一大衝擊！
必睇Bonus
今次《擊》玩孖碟裝，Disc2全Bonus都算幾多嘢睇！「奧斯卡得獎專訪」，三個人同自己塊面貼金，不睇也罷！但Making中，奇連點樣用30多日時間拍完此片、寄信俾個女又打回頭嘅背後意思，相信好多人都想知，呢度大家可以搵到答案；此外，矛躉王女拳手專訪，都好值得睇，睇咗先知戲中好多劇情取材，係好現實嘅寫照呢！
DVDPro（23326326）
地址：旺角奶路臣街6E德發商場地庫B4舖