華大（201）呢期整咗支利好嘅下降旗形，若然破位向上量度目標0.2元。華大上星期發咗兩個通告，一個係出售加列山道物業，售價1.8億元，有待股東大會通過。第二個係華大北角地皮，正喺招標階段。加列山道物業成本價9500萬元，但因04年度（12月止）資產估值到價，所以，呢勻出售，帳面冇錢賺，但可以為華大每股套現3仙。後邊北角地皮，先係啖啖肉，已經有專業估計，地皮市值13億元，華大扣除成本開支，可以淨袋6、7億銀。即係話，若然有結果，華大每股可以套現近0.24元，每股純利0.13元，華大現價不過0.158元，上到旗形目標，較未重估北角地皮前NAV0.27元，都有25%折讓，較重估後NAV，折讓達50%，絕對冇炒過龍。
大孖沙轉炒中電信
中國電信（728）今年2月以嚟，一路兜底，家陣正係兜緊圓底另一邊，即係話，屬啱起步格局，又講兩點：第一，4月以嚟，大部份名牌包括花旗、大摩、瑞銀及里昂，唔係建議增持或者買入中電信，就係建議由呢期升到飛起嘅中移動（941）換馬中電信，摩通前星期更加身體力行，增持中電信（最新持13.9億股或10.04%H股）。大孖沙評論及行動所見，似係繼中移動後，轉炒落後電信概念。
第二，恒指剛創4年新高冇耐，中移動出咗唔少力，國指暫時重未突破4年高位，要砌上，唔少得中電信，皆因中電信唔嘢少，國指當中，市值排第4（388億元）。中電信兜埋另一底，去到頸線位3.125元，破埋頸線，圓底量度升幅3.675元，預期PE不過10倍。
錢雋