爆機狂迷：《鬼武者》製作班底日本武士靠跳打大佬

鬼武者玩法深入民心，好多遊戲都唔多唔少有其影子，今個星期就有隻攞正牌「翻」嘅《GENJI》推出，由於遊戲開發班底絕大部份都曾參與過《鬼武者》嘅開發，在早前美國E3遊戲展中，更受好多專業Game迷高度評價！絕對係呢期人氣度最高之作！另一隻新推出嘅《影牢II-DarkIllusion》，就轉玩陷阱，對喜好動作遊戲嘅機迷，一樣可打得過癮。

記者：許福合

《GENJI》故事背景原來以日本歷史而設計，不過相信甚少香港玩家知道當中背景同人物，不過唔緊要，動作遊戲好處之一，係只要反應快就可以過關，而且今集由原CAPCOM製作人岡本吉起監製，淨係睇遊戲畫面質素，已經相當有吸引力。

■弁慶人設，真係好鬼野蠻人Feel。

■義經個造型，好明顯取材自趙雲。

■靜御前亦係遊戲角色，不過要後期先用到。

刀光劍影　打到飛起

講到故事更係跟足日本歷史而設計，場景人物當然亦係岡本吉最耍家嘅日本武士風格，而一路玩落去，場景重明顯會有四季之分，玩家會見到好有日本風格的場景，算係遊戲中一個特色！而一邊玩落去重會配合超多動畫CG，雖然動畫質素都好有水準，不過對筆者呢啲無耐性嘅玩家，真係有啲唔耐煩，加埋無得將動畫飛走，認真要彈！一開始遊戲，玩家可以使用義經同弁慶兩個角色，兩者皆有唔同特色；義經因為身體特別輕盈，所以對敵時能夠做出好多花巧動作，而武器就使用二刀流雙刀，揮動時重會配合劍光，非常華麗。而轉玩弁慶時，又有另一番趣味，佢怪力驚人，所以打法亦都唔同，最聰明就係先將敵人引到一齊，一次掃晒！

■弁慶揸棍掃敵，簡直係橫掃千軍。

■傳統日本武士外形當然唔少得。

■當然唔少得升級系統，升得快唔快就睇你表現。

■怪物設定有好多款式，此隻可能係泰式。

■呢雙「紅獅子」威力驚人，還會合作攻擊。

■使用連環斬，威力比一般攻擊大。

殺陣慢動作必殺技

開始遊戲後，見到嘅都係一啲卒仔，攻擊力唔強，甚至係有點遲鈍，所以玩家最好利用卒仔來熟習操作，同埋盡量取得更高連斬，加快升級速度。當玩家開始熟練，正式敵人亦開始會出現，而Boss級角色一般都會較大隻，而對敵時畫面底下會出現Boss嘅生命值，到時要小心應付；雖然每隻Boss都會用唔同武器，所以攻擊招數亦各有唔同，不過對付方法都有個共通點，就係多利用跳躍同抵擋，跳躍除咗可以閃避攻擊外，同時，更可以連消帶打，使用連續技，筆者就覺得比一般攻擊威力強得多。另外還可使出「殺陣」，使出此招時，畫面超靚，主角身體會出現光芒，而敵人就會進入慢動作，趁住呢個時機攻擊，必殺技威力會大為提高，不過就要注意時機。

■對付Boss，利用跳起閃避同出招都係好戰略。

■要使出殺陣，必須先得到呢粒天鋼石。

■過版時重會因應玩家表現評分。

同場加映：《影牢II-DarkIllusion》陷阱遊戲

《影牢II》由大廠Temco出品，畫面當然係信心保證，而同《GENJI》唔同，雖然同樣係動作遊戲，不過故事背景都比較西化，而攻擊就加入好多唔同招式，玩家將扮演一名落難公主，可以話手無縛雞之力，為咗應付追兵，只有利用各種「陷阱」，陷阱有「天花板」、「地板」、「牆壁」等，既有造成敵人損傷嘅陷阱外，亦有封鎖敵人行動等陷阱，攻擊變化好多。而敵人會使出好多魔法，而且重會替自己人加狀態同補血，係隊中嘅救傷兵，所以一定要好好「照顧」佢！

■人物設定會較為西化，同《GENJI》風格好唔同。

■利用陷阱攻擊，威力同樣驚人。