混血名模Rosemary早前首次到東歐一星期，為鄧達智拍攝新裝廣告。她穿上性感薄紗裙在河堤吹冷風拍照，又在大熱天氣披皮草上陣，她又與奧運跳遠運動員合作，更大讚對方身形又fit又靚仔。
名模Rosemary入行以來，長期為香港設計師鄧達智（William）演出時裝騷，她早前遠赴匈牙利布達佩斯等東歐多國，為William○五年秋冬系列拍攝廣告相。
旅程眼界大開
Rosemary透露首次去東歐，一星期工作之行已令她眼界大開，她說：「第一日我有時差，好早就起咗身，即刻走去巿場感受當地人嘅日常生活，重買咗好多手信如餅乾，第二日就忙於四出觀光，欣賞有歷史文化嘅建築物同名勝，影咗好多相。可惜今次得我一個，媽咪冇同行，所以冇人可以分享旅程嘅喜悅。」
Rosemary連拍三天，走勻河堤、火車站、公園、舊城等地，她大談拍攝趣事時說：「東歐早上同傍晚天氣幾凍，但偏偏嗰時就畀咗啲性感、大露背嘅薄衫裙我着，而下晝出猛太陽，就反而着皮草、長褸，搞到我有啲唔適應，幾辛苦又幾好笑。」
夥拍運動健將
鄧達智今次更安排當地男模特兒與Rosemary合作，兩人要相擁、攬腰擺甫士，Rosemary說：「其實佢係曾經參加過奧運跳遠比賽嘅運動員，part-time做模特兒，所以身形好fit，好靚仔㖭！」問她可有擦出火花？她即大笑避答說：「總之佢好靚仔啦。」Rosemary又不忘大讚鄧達智新裝說：「William今季作品華麗又舒適，最特別係鞋履款式多元化，有sharpcolor蛇皮靴，亦有黑白basic嘅高跟鞋。」
